Россиянинг Ленинград вилоятида полиция ходимлари халқаро қидирувда бўлган уч нафар шахсни қўлга олди, деб хабар беради 47Channel. Улар Ўзбекистон фуқаролари бўлиб, растрата ва ҳужжатларни қалбакилаштириш учун қидирувга берилган.
Қайд этилишича, улардан бири 37 ёшли мигрант, Турбостроитель кўчасида жойлашган уйида қўлга олинган. 2018 — 2020 йилларда эркак Фарғона вилоятида фуқаролар номига уларнинг розилигисиз кредит расмийлаштирган. У ўз ҳамюртларининг имзоларини сохталаштирган. Умумий ҳисобда фирибгар 528 миллион сўм кредит расмийлаштирган. Барча пулларни ҳисобига ўтказиб олиб, ўз эҳтиёжлари учун сарфлаб юборган. 2022 йил августда унга нисбатан халқаро қидирув эълон қилинган.
Иккинчи фуқаро эса Ломоносов туманида қўлга тушган. 29 ёшли Ўзбекистон фуқароси ҳам юқоридаги айбловлар бўйича қидирувда бўлган. Компания раҳбари бўлган бу шахс сохта ҳужжатлар билан ўзгалар мулкини ўзлаштирган. Етказилган умумий зарар 30 миллион сўм. У 2022 йил сентябрдан буён қидирувда бўлган.
22 ёшли Ўзбекистон фуқароси эса Гатчинада ушланган. У ҳайдовчилик гувоҳномасини олиш мақсадида ўзгалар ҳужжатига суратини ёпшириб, ўзини бошқа шахс сифатида таништирган. Эркак 2023 йил октябрдан бери қидирувда эди.
Мигрантларнинг барчаси Петербург ва Ленинград вилояти ҳудудида рўйхатдан ўтмаган ҳолда яшаб келган. Ленинград полицияси Ўзбекистондаги ҳамкасбларига қўлга олинган шахслар бўйича маълумот берган. Уларга нисбатан қамоққа олиш эҳтиёт чораси қўлланилган.
Аввалроқ Россиянинг Ленинград вилоятида халқаро қидирувга берилган 25 ёшли Ўзбекистон фуқароси қўлга олингани тўғрисида хабар берилганди.
Изоҳ (0)