Украина ҳарбий-ҳаво кучлари мамлакатга рекорд даражада камикадзе дронлари ҳужуми уюштирилганини маълум қилди

Украина ҳаво кучлари бугун 25 ноябрга ўтар кечаси мамлакат ҳудудига рекорд даражадаги камикадзе дронлари зарба берганини маълум қилди, деб ёзади “Strana.uа”.

Хусусан, Киев, Днепропетровск ва Николаев вилоятлари расмийлари дрон ҳужуми ҳақида хабар берган.

Киев мэри Виталий Кличконинг Telegram’да хабар беришича, пойтахт узра уриб туширилган дронларнинг қолдиқлари Голосеевский туманидаги тўрт қаватли турар жой биноси, Днепровскийдаги кўп қаватли уйнинг юқори қавати зинапоясига тушган. 

Кличконинг аниқлик киритишича, икки аёл Соломенский туманида вайрон бўлган уйнинг иккинчи қаватида қолиб кетган. Шаҳар ҳокими, шунингдек, дронлар ҳужуми натижасида 11 ёшли бола жароҳатланганини айтди. Кейинроқ у Соломенский туманида икки нафар инсон қурбон бўлганини маълум қилди.

Украина Қуролли кучлари қўмондони Сергей Наевнинг Telegram’да маълум қилишича, бугун Украинанинг Шимолий ҳудудида жами 55 та дрон йўқ қилинган. Унга кўра, еттита дрон Суми йўналишида, тўрттаси Чернигов йўналишида ва 17 таси Киев йўналишида уриб туширилган.

Шу билан бирга, Киев ҳарбий маъмурияти бугунги дронлар ҳужуми жанговар ҳаракатлар бошланганидан бери энг оммавий ҳужум бўлганини, шаҳар узра 50 та дрон уриб туширилганини маълум қилди. Украина Энергетика вазирлигининг маълум қилишича, Киев марказида ҳужум натижасида 77 та турар-жой биноси ва 120 та муассаса электр таъминотисиз қолган.

Россия расмийларининг билдиришича, махсус операция доирасида ҳужумлар фақат ҳарбий инфратузилма ва ҳарбий мақсадларда фойдаланиладиган объектларга нисбатан амалга оширилмоқда.