Европа Иттифоқи Киевга урушда ғалаба қозониш учун зарур бўлган қурол ва ўқ-дориларни етказиб бермаса, Украина беихтиёр Россия билан тинчлик музокараларига киришиш хавфи бор. Бу ҳақда Литва ташқи ишлар вазири Габриэлиус Ландсбергисга таяниб, Bloomberg хабар берди.
Литвалик дипломат Киевнинг ракета тизимлари ва ўқ-дориларининг етишмаслиги, шунингдек, Евроиттифоқда қарор қабул қилиш жараёни чўзилиши Украинани тинчлик сўрашдан бошқа чораси қолмайдиган ҳолатга келтириши мумкинлигини айтди. Габриэлиус Ландсбергис “бу Украинанинг танлови бўлмаслигини” таъкидлади.
“Биз билган Украина ва биз нафас олар эканмиз ёрдам берадиган Украина ҳеч қачон террорчилар билан музокаралар олиб бормайди. Лекин реаллик шундай бўлиши мумкин”, — деди Ландсбергис.
У АҚШ ёрдами республикачилар томонидан тўсиб қўйилгани ва Евроиттифоқ Укаинани етарлича ўқ-дорилар билан таъминлай олмаётганидан ҳафсаласи пир бўлганини билдирди.
“КХДР Россияга Европа Иттифоқи Украинага ёрдам бергандан кўра кўпроқ ёрдам берса, бу кулгили кўринади”, — деди у.
Изоҳ (0)