Тожикистон Озарбайжон билан “Данғара” эркин иқтисодий зонасида (ЭИЗ) нефтни қайта ишлаш заводини ишга тушириш бўйича сармоявий лойиҳани амалга оширишга келишиб олди. Бу ҳақда Тожикистон Иқтисодий ривожланиш ва савдо вазирлиги матбуот хизмати хабар берди.
Қайд этилишича, Тожикистон иқтисодий ривожланиш ва савдо вазири Завқи Завқизода ҳамда Озарбайжон иқтисодиёт вазири Микаил Жабборов ўртасидаги музокаралар давомида саноат соҳасида бошқа қўшма сармоявий лойиҳалар бўйича келишувларга эришилган.
Хусусан, томонлар Тожикистонда гидроэлектр станцияларини яратиш, “Талко” (Тожик алюминий компанияси) ишлаб чиқариш қувватларини ошириш ва агросаноат кластерларини яратиш бўйича лойиҳаларни амалга ошириш масалаларини муҳокама қилган.
Бундан ташқари, томонлар Озарбайжонга Тожикистоннинг бирламчи алюминий, криолит ва алюминий фторидини, Озарбайжондан Тожикистонга алюминий оксидини етказиб бериш, шу билан бирга, уларни темирйўл орқали ташишда чегирмалар беришга келишиб олган. Лойиҳаларни амалга оширишнинг аниқ чора-тадбирларини ишлаб чиқиш учун икки томонлама ишчи гуруҳ тузилган.
Тожикистон Иқтисодиёт вазирлигининг аниқлик киритишича, 2023 йилнинг ўн ойи давомида икки давлат ўртасидаги товар айирбошлаш ўтган йилнинг шу даврига нисбатан 1,5 баробар ошган. Тожикистон Инвестициялар ва давлат мулкини бошқариш давлат қўмитаси маълумотларига кўра, республика ва Озарбайжон ўртасидаги ўзаро товар айирбошлаш ҳажми 2022 йил охирида 6,2 миллион долларни ташкил этиб, 2021 йилга нисбатан 2 фоизга ошган.
Изоҳ (0)