Tojikiston Ozarbayjon bilan “Dang‘ara” erkin iqtisodiy zonasida (EIZ) neftni qayta ishlash zavodini ishga tushirish bo‘yicha sarmoyaviy loyihani amalga oshirishga kelishib oldi. Bu haqda Tojikiston Iqtisodiy rivojlanish va savdo vazirligi matbuot xizmati xabar berdi.
Qayd etilishicha, Tojikiston iqtisodiy rivojlanish va savdo vaziri Zavqi Zavqizoda hamda Ozarbayjon iqtisodiyot vaziri Mikail Jabborov o‘rtasidagi muzokaralar davomida sanoat sohasida boshqa qo‘shma sarmoyaviy loyihalar bo‘yicha kelishuvlarga erishilgan.
Xususan, tomonlar Tojikistonda gidroelektr stansiyalarini yaratish, “Talko” (Tojik alyuminiy kompaniyasi) ishlab chiqarish quvvatlarini oshirish va agrosanoat klasterlarini yaratish bo‘yicha loyihalarni amalga oshirish masalalarini muhokama qilgan.
Bundan tashqari, tomonlar Ozarbayjonga Tojikistonning birlamchi alyuminiy, kriolit va alyuminiy ftoridini, Ozarbayjondan Tojikistonga alyuminiy oksidini yetkazib berish, shu bilan birga, ularni temiryo‘l orqali tashishda chegirmalar berishga kelishib olgan. Loyihalarni amalga oshirishning aniq chora-tadbirlarini ishlab chiqish uchun ikki tomonlama ishchi guruh tuzilgan.
Tojikiston Iqtisodiyot vazirligining aniqlik kiritishicha, 2023-yilning o‘n oyi davomida ikki davlat o‘rtasidagi tovar ayirboshlash o‘tgan yilning shu davriga nisbatan 1,5 barobar oshgan. Tojikiston Investitsiyalar va davlat mulkini boshqarish davlat qo‘mitasi maʼlumotlariga ko‘ra, respublika va Ozarbayjon o‘rtasidagi o‘zaro tovar ayirboshlash hajmi 2022-yil oxirida 6,2 million dollarni tashkil etib, 2021-yilga nisbatan 2 foizga oshgan.
Izoh (0)