Шавкат Мирзиёев 24 ноябрь куни Бокуга амалий ташрифи доирасида Озарбайжон президенти Илҳом Алиев билан музокара ўтказганди. Давлат раҳбари мамлакатлар ҳамкорлигини кенгайтиришга қаратилган қатор таклифларни билдирди.
Президент матбуот котибининг хабар беришича, Ўзбекистон етакчиси ҳамкорликни юқори суръатда давом эттириш ва тубдан кенгайтириш мақсадида қуйидагиларни таклиф этди:
- Озарбайжон президентини 2024 йилда расмий ташриф билан Ўзбекистонга боришга;
- 2024 йилни Ўзбекистон билан Озарбайжон ўртасидаги кўп қиррали муносабатларни жадал ривожлантириш йили деб эълон қилишни;
- 2024 йил учун ўзаро манфаатли ҳамкорликнинг 10 та янги йўналишини;
- ахборот маконида тажриба алмашиш ва ҳамкорликни мувофиқлаштириш учун икки мамлакат Президент администрацияларининг тегишли хизматлари ўртасида тизимли мулоқотни йўлга қўйишни;
- Илҳом Алиевни 2025 йилда Ўзбекистонда бўлиб ўтадиган “Марказий Осиё — Кўрфаз араб давлатлари ҳамкорлик кенгаши” саммитида бош фахрий меҳмон сифатида иштирок этишни.
Давлат раҳбари 24 ноябрь куни Бокуда БМТнинг Марказий Осиё иқтисодиётлари учун махсус дастури (СПЕКА) биринчи саммитида иштирок этади. Тадбир кун тартибидан дастур доирасидаги кўп томонлама ҳамкорликни янада кенгайтириш, минтақавий лойиҳаларни қўллаб-қувватлаш учун Мақсадли фонд ташкил этиш, транспорт йўлакларини рақамлаштириш учун “йўл харитаси”ни қабул қилиш, ишбилармонлик ташаббусларини илгари суриш ва бошқа масалалар ўрин олган.
Изоҳ (0)