“Ногиронлиги бўлган фуқаролар аукционда ер участка сотиб олса унга давлат томонидан 30 млн сўмгача ёрдам берилади” — вазирлик

Ногиронлиги бўлган фуқаролар аукцион орқали ер участка сотиб олмоқчи бўлса, улар сотиб олаётган ер участка пулининг 30 миллион сўмгача бўлган қисми давлат томонидан қоплаб берилади. Бу ҳақда “Дарё”га Камбағалликни қисқартириш ва бандлик вазирлиги ахборот хизмати хабар берди.

Маълум қилинишича, ногиронлиги бўлган шахс ва таркибида ногиронлиги бўлган шахс бор оиланинг электрон онлайн-аукцион орқали ер участкасини сотиб олиш билан боғлиқ харажатларини қоплаб бериш тартиби тўғрисида низом тасдиқланган.

“Низомда ер участкасини аукцион орқали сотиб олиш харажатларидан келиб чиққан ҳолда, оиласи таркибида ногиронлиги бўлган шахслар сонидан қатъи назар, базавий ҳисоблаш миқдорининг 100 бараваригача (30 миллион сўмгача) миқдорда бир марталик тўлов ажратилиши белгиланган. Бунда харажатлар ушбу миқдордан юқори бўлган ҳолларда 30 миллион сўмгача бўлган қисми қоплаб берилади”, — дейди вазирлик масъули.

Қўшимча қилинишича, имтиёзли тоифадаги шахсларда охирги 12 ой давомида ўзи ёки оила аъзолари номида яшаш учун мўлжалланган турар жойи ёки ер участкаси мавжуд бўлмаслиги керак.

“Шунингдек, ер участкаси охирги уч ой ичида аукцион орқали харид қилинган ва Ўзбекистон ҳудудида бўлиши, ногиронлиги бўлган шахс деб топилган, шунингдек, ‘Темир дафтар’, ‘Аёллар дафтари’, ‘Ёшлар дафтари’нинг бирида турган бўлиши, имтиёзли тоифадаги шахс аукцион орқали ер участкаси сотиб олгандан бошлаб 3 ой ичида ўз ҳудудидаги туман (шаҳар) камбағалликни қисқартириш ва бандлик бўлимига мурожаат қилиши лозим. Ушбу муддатдан кечикиб берилган аризалар кўриб чиқилмайди”, — дейди вазирлик вакили.

Маблағ ажратиш тўғрисида белгиланган тартибда қарор қабул қилингандан сўнг 5 иш кунида имтиёзли тоифадаги шахсларнинг аризасида кўрсатилган банк пластик ҳисобварағига маблағ ўтказилиши таъминланади.