“Кимнидир бепул уй билан таъминлаш масаласи умуман йўқ” — эҳтиёжманд ва ногиронларни уй-жой билан таъминлаш бўйича алоҳида тартиб ишлаб чиқилаётгани маълум қилинди

“2024 йил учун Ўзбекистон Республикасининг Давлат бюджети тўғрисида”ги қонун лойиҳасига бағишланган мажлисда субсидия олиш ва уни қўллашда амалиётда муаммолар бўлаётганига тўхталиб ўтилди.

Депутат Анвархон Темировнинг айтишича, ногиронлиги бор ёки оғир ижтимоий аҳволга тушиб қолган фуқаролар субсидия олинганидан кейин муаммога дучор бўляпти.

“Уларнинг иш ҳақи белгиланган тартибларга ёки банк белгилаган тартибга тўғри келмаяпти. Фуқарога субсидия маблағи ажратилмоқда, лекин унинг ойлик маоши берилган кредит маблағларини қайтаришга етарли эмас, деган важ билан уй олишга рад жавоби берилмоқда.

Иккинчиси, оғир аҳволга тушиб қолган фуқаролар ойлик иш ҳақи белгиланган тартибдан паст бўлгани учун улар уй-жой ёки таъмирлаш учун бериладиган субсиядия маблағини ололмаяпти”, — деди депутат.

Бунга бош вазир ўринбосари Жамшид Қўчқоров жавоб бери. Унинг айтишича, ҳақиқатан ҳам ажратилган субсиядияларнинг маълум бир қисми вилоятларда фойдаланилмасдан қолиб кетмоқда.

“Агар эҳтиёжманд оилалар ҳақида гапирадиган бўлсак, биринчи навбатда, боқувчисини йўқотган ва ногиронлар ҳақида гапиришимиз керак, деб ўйлайман. Бу бўйича янги тартиб ишлаяпмиз. Уларни уй-жой билан таъминлашнинг бошқача методи керак. Субсидия улар учун эмас.

Субсидиянинг асл мазмуни, моҳияти шундайки, ипотека кредити олиш учун уйнинг биринчи тўловини тўлашга имконияти бўлмаган, лекин доимий даромадга эга бўлган оилага тегишли. Кимнидир бепул уй билан таъминлаш ҳақида умуман масала йўқ. Фақат етимлар учун бепул уй берилиши кўзда тутилган.

Аслида муҳтож ёки ногирон дегани ойлик даромади етарли бўлмаган фуқаролардир. Муҳтожлар ҳамма мамлакатда ҳам етарли. Муҳтожлар ичида боқувчиси йўқ ва ногиронлар ҳақида гапирадиган бўлсак, улар бўйича алоҳида масалани кўриб чиқяпмиз. Бу бўйича Вазирлар Маҳкамасида икки-учта вазирлик биргалашиб тартиб устида ишламоқда”, — деди бош вазир ўринбосари.

Унинг алоҳида таъкидлашича, ҳудудларда айрим раҳбарлар субсиядан мурожаатчилардан қутулиш учун фойдаланмоқда.

“Айрим ҳудудларда мутасаддиларимиз фуқаро мурожаат қилиб келган вақтда ундан қутилиш учун субсиядини дастак қилиб қўлламоқда. Масалан, бир бева-бечора келиб уй сўраса, “Бўпти, синглим мана”, деб уни қўлига субсидияни тутқазиб юборади. Бу тўғри йўл эмас, субсидия бева-бечоралар учун эмас”, - деди Жамшид Қўчқоров.

Маъулмот учун, 2024 йилда уй-жой шароитларини яхшилашга муҳтож фуқароларга ипотека кредити бўйича ипотека кредитининг дастлабки бадали ва фоизларини бир қисмини қоплаш учун 1,5 триллион сўм ажратиш режалаштирилган.

Аввалроқ бош вазир ўринбосари нима учун таркибида шакар бўлган газли ичимликларнинг бир литрига 500 сўм акциз солиғи солинаётганига изоҳ берган эди.