Сэм Альтман OpenAI компанияси директорлигига қайтадиган бўлди. У бир ҳафта аввал лавозимдан олинганди

Сэм Альтман ChatGPT чат-ботини яратган OpenAI компанияси бош директорлиги лавозимига қайтади. У 17 ноябрь куни ишдан олинган эди.

Биз Сэм Альтман таркибида Брет Тейлор (раис), Ларри Саммерс ва Адам Д’Анжело бўлган янги директорлар кенгаши билан бош директор лавозимига қайтиши бўйича принципиал келишувга эришдик. Айни вақтда қолган тафсилотлар муҳокама қилинмоқда, — дейилади компания хабарида.

Алmтманнинг ўзи ҳам компанияга қайтишини тасдиқлаган. “Мен OpenAI’ни яхши кўраман ва охирги бир неча кундаги барча саъй-ҳаракатларим ушбу жамоа ҳамда миссияни сақлаб қолишга қаратилди. Кечаси Microsoft билан бирлашишга қарор қилганидам, бу мен ва жамоам учун энг яхши йўллиги ойдинлашганди”, — деб ёзади OpenAI асосчиси.

Альтманнинг сўзларига кўра, директорлар кенгаши таркиби алмашганидан кейин у OpenAI’га қайтишни “интиқлик” билан кутмоқда ва Microsoft билан мустаҳкам шерикликни ривожлантириш умидида.

Шунингдек, компанияга унинг асосчиларидан бири Грег Брокман ҳам қайтди. “Биз янада кучли бўлиб қайтамиз ва бирдамроқ бўламиз”, — деб ёзади у.

Альтман 17 ноябрь куни OpenAI раҳбарлигидан бўшатилганди. Компания директорлар кенгаши уни раҳбарият билан доим ҳам “ростгўй бўлмагани учун” лавозимдан олган. Бундай қарорга OpenAI’нинг деярли барча ходимлари норозилик билдирди. 770 нафар ходимнинг 730 дан ортиғи очиқ хат ёзиб, директор қайтмаса Альтман ортида Microsoft’га ўтиб кетишлари билан таҳдид қилган.