Sem Altman OpenAI kompaniyasi direktorligiga qaytadigan bo‘ldi. U bir hafta avval lavozimdan olingandi

Sem Altman ChatGPT chat-botini yaratgan OpenAI kompaniyasi bosh direktorligi lavozimiga qaytadi. U 17-noyabr kuni ishdan olingan edi.

Biz Sem Altman tarkibida Bret Teylor (rais), Larri Sammers va Adam D’Anjelo bo‘lgan yangi direktorlar kengashi bilan bosh direktor lavozimiga qaytishi bo‘yicha prinsipial kelishuvga erishdik. Ayni vaqtda qolgan tafsilotlar muhokama qilinmoqda, — deyiladi kompaniya xabarida.

Altmanning o‘zi ham kompaniyaga qaytishini tasdiqlagan. “Men OpenAI’ni yaxshi ko‘raman va oxirgi bir necha kundagi barcha sa’y-harakatlarim ushbu jamoa hamda missiyani saqlab qolishga qaratildi. Kechasi Microsoft bilan birlashishga qaror qilganidam, bu men va jamoam uchun eng yaxshi yo‘lligi oydinlashgandi”, — deb yozadi OpenAI asoschisi.

Altmanning so‘zlariga ko‘ra, direktorlar kengashi tarkibi almashganidan keyin u OpenAI’ga qaytishni “intiqlik” bilan kutmoqda va Microsoft bilan mustahkam sheriklikni rivojlantirish umidida.

Shuningdek, kompaniyaga uning asoschilaridan biri Greg Brokman ham qaytdi. “Biz yanada kuchli bo‘lib qaytamiz va birdamroq bo‘lamiz”, — deb yozadi u.

Altman 17-noyabr kuni OpenAI rahbarligidan bo‘shatilgandi. Kompaniya direktorlar kengashi uni rahbariyat bilan doim ham “rostgo‘y bo‘lmagani uchun” lavozimdan olgan. Bunday qarorga OpenAI’ning deyarli barcha xodimlari norozilik bildirdi. 770 nafar xodimning 730 dan ortig‘i ochiq xat yozib, direktor qaytmasa Altman ortida Microsoft’ga o‘tib ketishlari bilan tahdid qilgan.