Apple компанияси ходимларига ChatGPT ва бошқа ташқи сунъий интеллект воситаларидан фойдаланишни тақиқлади. Бу ҳақда The Wall Street Journal хабар берди.
Компаниядаги манбалар ва ходимларга электрон почта орқали юборилган хатлар мазкур маълумотни тасдиқлайди. Apple бундай дастурлардан фойдаланадиган ходимлар фойдаланувчиларнинг махфий маълумотларини ошкор қилишидан хавотирда. Чунки ходимлар киритилган барча сўровлар ва олинган жавобларни эслаб қолади.
Шунингдек, Apple раҳбарияти ўз ходимларига код ёзишни автоматлаштирадиган Microsoftъга қарашли GitHubънинг Copilot дастуридан фойдаланмасликни ҳам айтган. Шу билан бирга, 18 май куни OpenAI компанияси ChatGPT AppStore’да чиқарилишини эълон қилган ва илованинг Android ОC учун версияси ҳам чиқишини билдирган.
“IOS учун ChatGPT иловасини тақдим этамиз! Биз аллақачон АҚШда ишламоқдамиз ва келгуси ҳафталарда бошқа мамлакатларга ҳам тарқаламиз. Навбатда Android!” — дейилади хабарда.
ChatGPT нима?
ChatGPT (Chat generative pre-trained transformer) — OpenAI томонидан яратилган сунъий интеллект чатботи бўлиб, турли саволларга жавоб бериши, дастурчилар учун код ёзишга ёрдам бериши, талабалар учун эса курс ишларини ёзиб бериши мумкин. Бот ҳаттоки шеър ва иншолар ҳам ёза олади. OpenAIънинг асосий вазифаси инсон мияси бажара оладиган ҳамма нарсани қилувчи сунъий интеллектни яратишдан иборат.
Маълумот ўрнида, Италия ChatGPT’дан фойдаланишни тақиқлаган дунёдаги биринчи давлат ҳисобланади. Бунга чатбот ишлаб чиқарувчиси Американинг OpenAI компанияси шахсий маълумотларга оид қонунчиликни бузгани сабаб бўлмоқда. Жумладан, нейрон тармоқ +13 ёш чегарасига қарамай, фойдаланувчиларнинг ёшини текширмаслиги таъкидланади.
Изоҳ (0)