Наполеоннинг мактублари аукцион орқали сотилади

Франция императори Наполеон Бонапартнинг 11 та мактуби аукционга қўйилади. Бу ҳақда Bangkok Post хабар берди.

1812 йил 18 сентябрь санаси қўйилган мактубларнинг бирида император Москвага етиб келиб, олов билан деярли яксон қилинган шаҳарни кўрганини ёзади.

Бугун асосий даҳаларни кўздан кечирдим. Қачонлардир бу шаҳар жозибадор эди. Мен “эди” деяпман, чунки унинг ярмидан ортиғини олов яксон қилган — деб ёзади Наполеон.

58,3 минг долларга сотилаётган бошқа бир мактубда Наполеон шаҳардаги алкогол захиралари ҳақида ёзади.

Биз учун жуда керак бўлган вино ва ликёрга тўла ертўлаларни топдик — дея бўлишади император.

Бундан олдинроқ 79,5 минг долларга сотилган мактубда бўлса Наполеон Франция жанубидаги Тулон шаҳрига штурм уюштириш учун қанча ўқ-дори зарурлиги ҳақида ёзади. Мактуб у император бўлиш йўлида раҳбарлик лавозимини олганидан кейин ёзилган.

Таъкидланишича, император ёзишмаларининг фақат бир қисми аукционга қўйилган.

Эслатиб ўтамиз, 2017 йилда Парижда бўлиб ўтган аукционда Наполеон Бонапартнинг тожидан олинган олтин дафна япроғи 625 минг еврога сотилганди.