Ўзбекистонда соғлом шахслар дорининг клиник тадқиқотида ихтиёрий равишда иштирок этишига рухсат берилди.
22 ноябрь куни президент томонидан имзоланган қонун билан айрим қонун ҳужжатларига фармакологик воситанинг ёки дорининг клиник тадқиқотида соғлом шахслар ихтиёрий равишда иштирок этиши мумкинлигига оид қўшимчалар киритилди.
Клиник тадқиқот раҳбари клиник тадқиқотда қатнашадиган шахсга тадқиқот усулининг аҳамияти, мазкур тадқиқотнинг моҳияти ва эҳтимолий хавфи ҳақида батафсил тушунтириш бериши шарт. Шахс тадқиқотнинг исталган босқичида унда иштирок этишни рад қилишга ҳақли.
Тадқиқотда вояга етмаган ёхуд муомалага лаёқатсиз шахс иштирок этганда, тадқиқотлар бошланишидан аввал унинг ота-онасидан ёки бошқа қонуний вакилларидан ёзма равишда розилик олиниши керак.
Вояга етмаган шахс иштирокидаги клиник тадқиқотдан олдин вояга етган шахсда клиник тадқиқот ўтказилган бўлиши керак.
Қонун расмий эълон қилинган кундан эътиборан кучга киради.
Изоҳ (0)