ССВ ҳузуридаги Фармацевтика маҳсулотлари хавфсизлиги маркази қалбаки дори воситаларини қандай фарқлаш мумкинлиги тўғрисида маълумот берди.
“Дори воситалари ва фармацевтика фаолияти тўғрисида”ги қонуннинг 3-моддасига кўра, қалбакилаштирилган дори воситаси ва тиббий буюм таркиби ёки хусусияти тўғрисида ёхуд ишлаб чиқарувчиси ҳақида ёлғон ахборот илова қилинган дори воситаси ва тиббий буюмдир.
Постмаркетинг назорати бошқармаси бошлиғи Шоира Назарованинг билдиришича, қалбакилаштириш ҳам товар номига (савдо номи), ҳам женерик дори воситаларига тегишли бўлиши мумкин. Бунда, таркибида тегишли ёки тегишли бўлмаган ингредиентлар киритилган, фаол моддалар йўқ ёки етарли бўлмаган ҳамда сохта қадоқланган маҳсулотларни кузатиш мумкин. Уларни эса лаборатория таҳлил натижалари бўйича сифатли ёки сифатсизлиги аниқланади ва тегишли хулоса берилади.
Дори воситасини харид қилаётганда қуйидагиларга эътибор бериш керак:
- нарх — қалбаки дори воситалари дорихоналарда оригинал дори нархига нисбатан арзон бўлади;
- маҳсулот қадоғи – ундаги ҳарфлар ва рақамлар ноаниқ, тасвирлар хира ва картон қутининг ўзи юпқа ва шаклини яхши ушламайди;
- серия рақам, штрих-код, ишлаб чиқариш санаси тушуниб бўлмайдиган даражада ноаниқ бўлади.
- қўллаш йўриқнома варағи худди нусхаланганга ўхшайди. Қадоқдаги ва дорининг ўз қолипидаги ишлаб чиқарилган сана ва сақлаш муддатлари бир бирига мос келмаслиги мумкин.
Харид қилаётган дори воситасида юқорида санаб ўтилган белгилар шубҳалантирса, дорихона томонидан мазкур дори воситасига тегишли мувофиқлик сертификатини сўраш лозим. Агарда бундай сертификат мавжуд бўлмаса ушбу ҳолат юзасидан Рақобатни ривожлантириш ва истеъмолчилар ҳуқуқларини ҳимоя қилиш қўмитасига мурожаат қилиш мумкин.
Изоҳ (0)