Иқтисодиёт ва молия вазирлиги Тошкент шаҳрида жойлашган “Қўйлиқ” ва “Чорсу” деҳқон бозорларидаги қишлоқ хўжалиги маҳсулотларининг 22 ноябрдаги улгуржи нархлари ҳақида маълумот берди.
Вазирлик ўрганишларига кўра, бугун “Чорсу”да мол гўштининг килоси 60 000 – 70 000 сўмдан, қўй гўшти 65 000 – 70 000 сўмдан сотилмоқда.
Лазер гуручининг килосини 18 000 – 25 000 сўмдан, нўхатни 18 000 – 20 000 сўмдан, қизил ловияни 14 000 – 17 000 сўм, мошни 10 000 – 12 000 сўмдан харид қилиш мумкин.
“Қўйлиқ”да картошканинг бир килоси 1 700 – 4 200 сўм, пиёзники 1 200 – 2 000 сўм, сабзи эса 1 000 – 2 500 сўм.
Мазкур бозорда бундан бир ҳафта илгари булғор қалампирининг килоси 2 000 сўмдан 8 000 сўмгача сотилган бўлса, бугун маҳсулотнинг юқори нархи 20 000 сўмгача кўтарилган.
Шу билан бирга, қовун нархида ҳам кескин ўсиш кузатилмоқда. Мазкур полиз экинининг донаси ўтган чоршанбада 10 000 – 25 000 сўм сотилган эди, бугунги нархи эса 50 000 сўмгача (2 баробар) ошган.
Етти кун олдин анор мевасининг килоси максимум 35 000 сўмгача сотилган бўлса, бугун бу нарх 50 000 сўмга етди.
Ананаснинг юқори нархи 40 000 сўмдан 55 000 сўмга, кивиники 15 000 сўмдан 20 000 сўмгача кўтарилди.
Аввалроқ узумнинг максимал нархи 45 000 сўмдан 90 000 сўмгача ошгани хабар қилинганди ва ҳозир ҳам мазкур нарх сақланиб қолган.
Бодринг нархида бир оз пасайиш кузатилган бўлиб, ўтган ҳафтадаги 20 000 – 25 000 сўмдан бугунги 16 000 – 23 000 сўмга тушган. Нок нархининг килоси ҳам 19 000 – 40 000 сўмдан 15 000 – 35 000 сўмга пастлаган.
Помидорнинг максимум нархи ўзгармаган – килоси 25 000 сўм. Баҳоси ўзгармаган мевалардан бананнинг килоси 18 – 23 минг сўм, олма 4 000 – 18 000 сўм.
Изоҳ (0)