Ўзбекистондаги жами газ захиралари қанчалиги айтилди

Республикада 296 та нефть-газ кони мавжуд бўлиб, уларда жами 1 трлн 854 млрд куб метр газ захиралари бор. Бу ҳақда “Ўзбекнефтгаз” АЖ томонидан Қашқадарёга уюштирилган пресс-турда маълумот берилди, дея хабар қилди “Дарё” мухбири. 

 

 

“Ўзбекнефтгаз” АЖга қарашли 122 та нефть-газ конида республика умумий захирасининг тенг ярми — 933 млрд куб метр газ захираси мавжуд. Хусусан:

• “Муборак нефть ва газ қазиб чиқариш бошқармаси” конларида — 305,3 млрд куб метр (33 фоиз);
• “Устюрт газ қазиб чиқариш бошқармаси” конларида — 259,4 млрд куб метр (28 фоиз);
• “Шўртан нефть ва газ қазиб чиқариш бошқармаси” конларида — 174,8 млрд куб метр (19 фоиз);
• “Газли нефть ва газ қазиб чиқариш бошқармаси” конларида — 191,4 млрд куб метр;
• “Водий нефть ва газ қазиб чиқариш бошқармаси” конларида — 2,3 млрд куб метр газ захиралари мавжуд.

“Ўзбекнефтгаз” АЖ бошқарув раиси Баҳодир Сидиқовнинг маълум қилишича, геологик-қидирув йўналишида олиб борилаётган тадқиқотлар доирасида Қорақалпоғистоннинг Устюрт регионида йирик газ захиралари истиқболини аниқлаш ишлари олиб борилмоқда.

 

 

“Ҳозир у ерда бурғулаш ишлари кетмоқда. Устюрт минтақасидаги Ғарбий қуйи Сургил конида 6 500 метр чуқурликка янги параметрик қудуқни бурғилаш ишлари бошланди. Бугунги кунда унинг бурғуланган қисмидаги чуқурлик 3 900 метрни ташкил қилмоқда. Йил якуни билан ушбу қудуқдан олинадиган геологик маълумотлар орқали Устюрт худудининг истиқболли қатламлари очилишига замин бўлади.

Бугунги кунда 122 та конларда 933 млрд куб метр захирамиз бўлса, Устюрт минтақасида жойлашган истиқболли майдонларда катта миқдордаги газ захиралари борлиги тахмин қилинмоқда. Бу ўз навбатида истиқболли конларимиз Устюрт минтақасида очилишини кўрсатмоқда. Буни нафақат ўзимизнинг геологлар, балки дунёда илғор компаниялардан ҳисобланган BCG ҳамда Schlumberger компаниялари томонидан чуқур ўрганишлар олиб борилган, уларнинг тегишли мутахассислари томонидан ҳам ушбу фикрлар баён қилинган. Натижалар эса декабрда аниқ бўлади“, — деди компания раҳбари.

Аввалроқ “Ўзбекнефтгаз” АЖ раисининг биринчи ўринбосари Беҳзод Усмонов аҳоли ва бизнеснинг энергетикага бўлган талаби тез ўсиб бораётганини айтганди.

“Ҳали кўп газимиз бор. Газ қазиб олиш ҳажми камайгани йўқ. Ҳозир ишлаб чиқарилган газ етишмаслиги аҳоли сонининг ошаётгани билан боғлиқ. Одамлар ҳам кўпаймоқда, ишлаб чиқариш қувватлари ҳам ошмоқда. Яъни энергетикага талаб жуда юқори. Тўғри, асосий ва энг йирик конларимизда ишлаб чиқариш пасаймоқда. Бунинг олдини олиш учун қўшимча чора-тадбирлар кўриляпти. Хусусан, янги конлар, қудуқларни бурғилаш ишлари олиб бориляпти. Бу йил ҳам бир нечта янги конлар очилиши режалаштирилган”, — деган у.