Ҳаётда ноёб қобилияти билан бошқалардан ажралиб турадиган инсонлар борлиги ҳақида эшитганмисиз? Энг қизиғи, ўзбек санъат вакиллари орасида ҳам ноёб қобилияти билан эътироф этиладиганлар бор.
Муножат Алимбоева: “Кўзим жодугарларникига ўхшайди”
Актриса Муножат Алимбоеванинг кўз ранглари икки хил. Тўғри буни бир қарашда пайқаш қийин, аммо синчиклаб қараган инсон унинг кўзларининг ранги бир-биридан фарқ қилишини пайқайди.
— Бир кўзимнинг ранги қора, бошқаси эса жигарранг. Кўзларимнинг ранги бир-биридан фарқ қилишини болалигимдаёқ пайқашган. Аввалига буни қандайдир касаллик аломати бўлса керак деб ўйлашган экан. Чунки қариндошимиз орасида ҳеч кимнинг кўз ранглари бундай эмас. Қизиқиб ўрганиб кўрганимда, тарихда жодугарларнинг кўзлари икки хил бўлган экан. Баъзан менда ҳам жодугарлик аломатлари бормикан деб ўйлаб қоламан, — дейди актриса кулиб.
Юлдуз Турдиева: “Танамга темир жисмлар ёпишади”
Юлдуз Турдиева ҳам ноёб хислатли инсонлар тоифасига киради. Ундаги кучли биоток сабаб темир жисмлар танасига ёпишади.
— Бу қобилият ҳисобланадими-йўқми, билмайман. Қўл ва юзимга қошиқ ва вилкалар ёпишади. Бу хислатим борлигини болалигимдаёқ билганмиз. Аслини олганда, ҳар бир инсоннинг ўзига хос биоток энергияси бўлади. Бундай қобилиятдан одамларни даволашда ҳам фойдаланишади. Аммо менда бундай хоҳиш бўлмаган, — дейди Юлдуз Турдиева.
Эгамберди Раҳимов актёрликдан кетиб, табиблик қиляптими?
“Тубанлик” фильмидаги Қўчқор роли билан томошабинларга яхши таниш бўлган актёр Эгамберди Раҳимовни ҳам ноёб қобилиятли инсонлар тоифасига киритиш мумкин. У актёрликдан ташқари, табобат илмига ҳам қизиқади.
— Табибликга қизиқишим аввалдан бўлган. Унинг актёрлик фаолиятимга ҳеч қандай таъсири йўқ. Сунъийликдан кўра, табиий неъматлар орқали шифо топишни маъқул кўраман. Буни ижоддаги яқинларим ҳам билишгани учун киноларда кўринмай қолсам “Актёрликни ташлаб, табиблик қилаяпсизми?” деб кулишади. Табобатга ҳам қизиққаним учун бу борадаги адабиётларни ҳам ўқиб, билмаганларимни ўрганаман, — дейди Эгамберди Раҳимов.
Муҳаммадали Абдуқундузов кучли хотира эгаси
Ўзбекистон халқ артисти Муҳаммадали Абдуқундузовни ижод аҳли кучли хотира эгаси сифати яхши билишади. У қисқа вақтда мураккаб сценарийларни ҳам ёд олиш хусусиятига эга.
— Аслида актёр учун сценарийни ёд олиш янгилик эмас. Чунки касбнинг масъулияти бевосита унга боғлиқ. Биз энди ишга келган вақтда бунга алоҳида эътибор бериларди. Шу боис ролга таклиф этишса, сценарийни талаб этаман. Сценарий ёдимда қолиши учун ҳар бир жумлага алоҳида эътибор бераман, — дейди актёр Муҳаммадали Абдуқундузов.
Изоҳ (0)