Пентагон раҳбари Ллойд Остин Украина раҳбарияти билан учрашув ўтказиш мақсадида Киевга келди. Бу ҳақда у ўзининг Х’даги (Twitter) саҳифасига ёзиб қолдирди.
“Украина етакчилари билан учрашиш учун Киевга келдим”, — дейди у. Остиннинг таъкидлашича, ташриф давомида муҳим хабарни етказади, яъни “АҚШ Украинани қўллаб-қувватлашни давом эттиради”.
Wall Street Journal газетаси олдинроқ Пентагоннинг Украинага қурол етказиб бериш учун маблағи қолмаётгани ҳақида ёзганди. Бунга қадар ҳарбий идора Украина ҳукуматига ажратилган маблағлар яна қанчага етишига аниқлик киритмаган. Қўшма Штатлар Мудофаа вазирлиги матбуот хизмати раҳбари Сабрина Сингҳ бу каби маълумотлар Украинага ҳеч қандай ёрдам келтирмаслиги ва Россия томонидан ўз мақсадларида фойдаланилиши мумкинлигини айтган.
Ўз навбатида АҚШ Мудофаа вазирлиги Конгрессни президент Жо Байденнинг Украина ва Исроилга қўшимча молиялаштиришни ажратиш борасидаги сўровини маъқуллашга чақирганди. Таъкидланишича, ушбу мамлакатга ёрдам кўрсатиш АҚШ миллий манфаатларини ҳимоя қилиш учун зарур.
Изоҳ (0)