АҚШ пинҳона равишда Исроилга ҳарбий ёрдам кўрсатишни оширди. Бу ҳақда Пентагоннинг ички ҳужжатларига таяниб Bloomberg хабар берди.
Мамлакат томонидан сўралган қуроллар Israel Senior Leader номи остидаги ҳужжатда келтирилган бўлиб, унга октябрь ойи охирининг санаси қўйилган. Агентлик маълумотларига кўра, қуроллар ҳозирда етказиб берилмоқда ёки Мудофаа вазирлиги уни АҚШ ва Европа захираларидан жўнатиш устида иш олиб боряпти. Октябрь охиридаги маълумотларда келтирилишича, Исроил 30 миллиметрли артиллерия қурилмалари учун 36 мингта снаряд, М141 бункерга қарши гранатомётлари учун 1,8 мингта ўқ-дори ва камида 3,5 мингта тунги кўриш мосламаларини олган.
Пентагондагиларнинг маълум қилишича, мамлакат “Исроил етарлича ҳимояланишини кафолатлаш учун ички захираларидан тортиб соҳавий каналларигача бир нечта усуллардан фойдаланмоқда”.
Исроил томони юборган сўровлар ичида Аpache AH-64 вертолётлари учун мўлжалланган 2 мингта Hellfire ракеталари, 57 мингта 155 миллиметрли снарядлар, 20 мингта М4А1 винтовкалари ва бошқалар мавжуд.
Ҳозирга қадар АҚШ Исроилга ўз захираларидан 312 та Тамир ракета тутиб қолувчиларини берган. бундан ташқари, Вашингтон Исроилдаги омборларидан Украинага юборишни режалаштирган 57 мингта 155 миллиметрли снарядлар ортга қайтарилган.
Аввалроқ The New York Times газетаси Жо Байден маъмурияти Украина ва Исроилга таъсир ўтказиш бўйича уринишларида қийинчиликларга дуч келаётгани ҳақида ёзганди. Байден маъмурияти Исроил бош вазири Биньямин Нетаньяхуни Ғазони бомбардимон қилишда “гуманитар пауза” қилишга кўндирмоқчи. Оқ уй Американинг Исроилга ёрдами Нетаняху Вашингтон маслаҳатига қулоқ тутишига кафолат бўлишига умид қилган. Бироқ бу содир бўлмади.
Изоҳ (0)