Telegram мессенжеридаги каналларда Фарғона вилоятида яшовчи беш нафар фарзанди бор аёлнинг уйи бузиб юборилгани акс этган видео тарқалди. Ҳолат жамоатчилик томонидан кенг муҳокама қилинмоқда. “Дарё” мухбири мазкур ҳолатга ойдинлик киритиш мақсадида ҳодиса тафсилотларини ўрганди.
Маълум бўлишича, воқеа вилоятнинг Марғилон шаҳридаги Янги Марғилон шаҳарчаси, “Янгиобод” маҳалла фуқаролар йиғинида содир бўлган. Уйи бузиб ташлангани айтилаётган аёл шу маҳаллада рўйхатда турувчи, аммо айрим сабабларга кўра ижарадаги уйида яшаб келаётган Муқаддасхон Холматова бўлган.
Аёлнинг айтишича, ушбу хонадон 2000 йилдан бошлаб турмуш ўртоғи ва унинг ҳаракати билан барпо этилган.
Турмуш ўртоғим билан 1995 йил турмуш қурганмиз. Бу уйнинг ўрни қуруқ ер эди. 2000 йилда шу ердан уй қура бошладик. Турмуш ўртоғим энг кичик фарзанд бўлгани сабаб, раҳматли қайнонам биз билан 26 йил бирга яшади. Турмуш ўртоғим Тошкентга қатнар эди. Кейинчалик кўп сипртли ичимлик ичгани сабаб, сурункали алкоголизм касаллигига дучор бўлди. Шу сабаб хўжайинимни 2017 йил вилоят Наркология диспансерига рўйхатга қўйиб, мажбурий даволай бошладик. Йилига икки маротаба даволанар эди, — дейди журналистлар билан суҳбатлашган аёл.
Уйи бузиб ташлангани айтилаётган аёлга кўра, у бу хонадонни 2020 йил тарк этган.
Хўжайинимдаги алкоголизм касаллиги шу даражада ривожланиб кетдики, ҳатто нима қилаётганини ҳам билмай, ўзини бошқаролмай қоладиган даражага етди. Менга ва болаларига пичоқ ва болта кўтариб, зўравонлик қилиш даражасига етгач, вояга етмаган болаларимни ҳимоя қилиш учун хонадонимдан чиқиб кетишга мажбур бўлдим, — дейди жабрланувчи экани айтилаётган аёл.
Муқаддасхон Холматованинг айтишича, эри ва у қурган уй қайнонасининг номида бўлган. 2019 йили қайнонаси ушбу уйни Муқаддасхон Холматованинг турмуш ўртоғига ҳадя сифатида берган.
Мен болаларни олиб уйдан чиқиб кетганимдан сўнг, эримдан алимент талаб қилиб, шикоят қилгандим. Шу сабаб эримнинг акаси унга маслаҳат бериб, онаси томонидан ҳадя қилинган ўзимизнинг уйимизни яна қайтариб онасининг номига ўтказишга кўндирган. Яъни мени уйга даъво қилади деб, уйни яна қайнонам номига ўтказишган. 2022 йил қайнонам оғир касаллик сабаб, тўрт ой ётиб қолган. Қайноғам шу пайт қайнонамни уйига олиб кетиб қараган. Ва ғаразли нияти — уйни ўз номига олишга эришган. Қайнонам эса шу воқеадан сўнг, бир ой ўтиб, вафот этган, — дейди аёл.
Муқаддасхон Холматованинг билдиришича, бу уй 2022 йилда сотувга ҳам қўйилган. Аммо аёл ва унинг беш нафар фарзанди шу уйда рўйхатда тургани сабаб, сотилмаган.
“Янгиобод” маҳалла фуқаролар йиғини раиси Жаҳонгир Юнусовнинг маълумот беришича, Баҳодир Холматов (уйни бузиб ташлагани айтилаётган фуқаро) марҳум укаси Фарҳод Холматовнинг бола-чақаси ва аёлини уйига киритмаган бўлса-да, укасининг ўғлига ғамхўрлик қилишини айтган. Марҳумнинг қизлари ҳам борлигига эса эътибор қаратмаган.
Уйи бузиб ташлангани айтилаётган аёлнинг журналистларга гапириб беришича, марҳум турмуш ўртоғи жонига қасд қилишидан тўрт кун олдин унга қўнғироқ қилиб, акаси уйни номига ўтказиб олиб, қайтариб бермаётганини, шу сабаб ўзини бирор нима қилиб қўйишини айтган.
Хўжайним 2022 йилнинг 4 май куни менга қўнғироқ қилиб, йиғлаб кечирим сўради. “Аяси менинг виждоним қийналяпти, акам уйни қайтиб бермаяпти, берса болаларимни олиб келаман дегандим. Телефон қилсам, телефонларимни кўтармаяпти. Нима қилишни билмаяпман, ўзимни бирор нима қилиб қўяман”, деганди. Шу мулоқотимиздан сўнг, тўрт кун ўтгач, 8 май куни эрим ўзини осиб қўйди, — дейди марҳум Форҳод Холматовнинг беваси.
“Янгиобод” маҳалла фуқаролар йиғини раиси Жаҳонгир Юнусовнинг таъкидлашича, мазкур ҳолат юзасидан маҳаллада сайёр суд бўлиб ўтган ва Муқаддасхон Холматова ҳамда фарзандларини уйга мажбурий тартибда киритиш бўйича суд қарори қабул қилинган. Суд қарори Мажбурий ижро бюроси ходимлари томонидан 2023 йилнинг 14 ноябрь куни ижро этилиши белгиланган. Бироқ, якшанба куни аёлнинг қайноғаси Баҳодир Холматов номаълум сабабларга кўра уйни техникалар ёрдамида буздириб юборган. Айни пайтда уй яшаш учун яроқсиз ҳолаг келиб қолган.
“Дарё” журналисти аёлга тегишли экани айтилаётган уйни бузиб ташлаган Баҳодир Холматов билан мулоқот қилиб, унинг ҳаракатига изоҳ олишга уринди. Аммо Баҳодир Холматов гаплашиш имкони бўлмади.
“Дарё” воқеалар ривожини кузатишда давом этади.
Изоҳ (0)