Мактабгача ва мактаб таълими вазирининг биринчи ўринбосари Усмон Шарифхўжаев “Кун.уз” журналистининг президентнинг 134-сонли фармони асосида яратилган, 2025 йилда тўлиқ жорий қилиш топширилган Миллий ўқув дастури ва у асосида яратилган дарсликларнинг тақдири ҳақидаги саволга жавоб бериб ўтди.
“Бу дастур ўша вақтдаги халқ таълимини кейинги 5 йилда (2022/2026 йилллар) ривожлантириш дастури деб номлаган эди. Унинг ичида таълим дастури, яъни миллий ўқув дастурини ишлаб чиқиш ва уни босқичма-босқич жорий этиш ҳақидаги банди бор эди.
Яъни миллий ўқув дастури ва унинг асосида болага бериладиган билим-кўникма, ишлаб чиқиладиган дарслик, методика ва бошқа нарсалар. 134-сонли фармон билан эса тизимни ривожлантириш миллий дастури тасдиқланган.
Мана шу ҳужжатнинг бандида хорижий ҳамкорлар билан ҳамкорликда миллий ўқув дастурини ишлаб чиқиш белгиланган.
Ўзи Миллий ўқув дастури нима деган саволга аниқлик киритиб олайлик. Бу бир нечта ҳужжатдан иборат бўлган, яъни ўқув дастурлари, ўқув режа, баҳолаш мезонларидан иборат бўлган ҳужжат ҳисобланади. Уни ишлаб чиқиш босқичма-босқич синфлар, фанлар кесимида амалга оширилмоқда.
134-фармон иловасида вазирликка Миллий ўқув дастурини жорий қилиш режасини тасдиқлаш вазифаси ҳам қўйилган. Яъни йиллар кесимида қайси синфда нима ишлаб чиқилади, шунга мос равишда дарслик, методикани ишлаб чиқишни белгилаш вазирликка ваколат сифатида қўйиб кетилганди.
Унда бола қайси синфда қайси кўникмани ўрганиши, унга қайси мавзуларни ўргатиш белгилаб берилади. Мана шу ҳужжатни ишлаб чиқишда бир қатор экспертлар иштирок этган. Бу ҳужжат бирданига ҳамма синф учун ишлаб чиқилмаган ва у такомиллаштирилмоқда”, — деди вазир ўринбосари.
Изоҳ (0)