Ўзбекистон малайзияликлар учун ўзига хос янги жой, чунки Ўзбекистонда йил 4 фаслдан иборат бу малайзияликлар учун қизиқ. Бу ҳақда Тошкент шаҳрида бўлиб ўтган “Ипак йўлида туризм” ярмаркасида Малайзия элчихонаси Туризм департаменти директори Нор Шазлй Бин Азми “Дарё” мухбирига берган қисқача интервьюсида айтиб ўтди.
Кўргазмада Франция, Япония, Малайзия, Таиланд, Корея, Россия, Қозоғистон, Беларусь, Озарбайжон ва бошқа 30 дан ортиқ давлатларнинг туризм маъмуриятлари иштирок этди.
Нор Шазлй Бин Азмининг айтишича, Малайзия туризм агентлигининг туризм бўлими ҳар йили Тошкентда бўлиб ўтадиган туризм ярмаркасида мунтазам қатнашиб келмоқда.
“Асосий мақсадимиз — ўзбекистонликларни Малайзия туризм маданияти билан таништириш. Бугунги ярмаркада биз туризм йўналишдаги 8 та компания билан иштирок этмоқдамиз.
Ўзбекистон малайзияликлар учун ўзига хос янги жой. Боиси Ўзбекистонда йилнинг 4 фаслини кўриш мумкин. Малайзияликлар асосан бу ерга қишда келиб, қорни томоша қилишади. Бундан ташқари Самарқанд, Бухоро каби тарихий шаҳарлар ҳам диққатга сазовор. Малайзия ҳам мусулмон давлатдир. Ўзбекистонда ислом тарихига оид кўплаб ёдгорликлар бор.
15 декабрдан бошлаб мунтазам авиақатновлар сони яна ҳам оширилади. Малайзиянинг Батик Air авиакомпанияси чартер рейсларини ҳафтада икки маротаба қўйишни режалаштирмоқда”, — дейди Нор Шазлй Бин Азми жаноблари.
Маълумот учун, Ўзбекистон фуқаролари ҳам Малайзияга 30 кунгача визасиз режимда боришлари мумкин. Худди шундай ваколат Малайзия фуқаролари учун ҳам жорий қилинган.
Изоҳ (0)