Афғонистон муваққат ҳукумати ўн йилдан кейин сувнинг қиймати бензинникидан ҳам юқори бўлишини маълум қилди. Бу ҳақда маҳаллий RТА Dari нашри хабар берди.
“Толибон” Ташқи ишлар вазирлигининг сиёсий ўринбосари Аббос Станекзай тегишли фикрни билдирган. У Афғонистонда сув етарли экани ва “Толибон” мамлакат сувини бошқариш имкониятига эгалигини таъкидлаган. Худди шундай фикрни Афғонистон Энергетика ва сув вазирлиги маслаҳатчиси Фаруқ Аъзам ҳам билдирганди. У мамлакат суви бошқарилса, қўшни давлатлар сувга муҳтож бўлишини айтганди.
Ўз навбатида, “Толибон” матбуот котиби Забиҳуллоҳ Мужоҳид Ўзбекистон Қўштепа каналидан жабр кўрмаслигига ваъда берган. У мазкур канал ҳар икки давлатга фойда келтиришини таъкидлаган. Бироқ экспертлар бунинг аксини айтмоқда, жумладан агар канал қуриб битказилса, минтақавий можаронинг кучайишига олиб келиши мумкин. Канал Амударё сувини Ўзбекистон билан чегарага йўналтиради. Афғонистон электр энергиясининг катта қисмини Ўзбекистондан импорт қилиши ҳисобга олинса, “Толибон” қўшни республикага қарши чиқолмайди.
“Иқлим ўзгариши Ўзбекистонни 15 фоиз сув йўқотишига сабаб бўлмоқда, агар канал қурилиши ортидан яна 10 фоиз йўқотса, Ўзбекистон 25 фоиз сув йўқотиши мумкин”, — дейилади яна бир прогнозда.
“Афғонистон Амударё сувидан фойдаланишга мутлақо ҳақли. Бу ҳуқуқ Афғонистонга халқаро конвенция лар билан берилган ва Афғонистон Амударё сувининг 27-30 фоизига эгалик қилади”, — деган эди сув хўжалиги бўйича мутахассис Нажибулла Садид.
Изоҳ (0)