Чеченистон раҳбари Рамзан Қодиров касаллиги ҳақида миш-мишларга изоҳ берди. Сиёсатчи ўзининг Telegram каналида тегишли маълумот билан бўлишди.
Рамзан Қодиров Чеченистон давлат думаси депутати Адам Делимхонов билан бирга Москвадаги Марказий клиник шифохонада бўлганини тасдиқлади.
“Дўстлар, шу кунларда оиламиз амакимиз Магомед Абдулхамидович Қодиров ҳақида жуда хавотирда. Яратганга ҳамдлар бўлсин, у тузалмоқда. Москвага иш сафарим чоғида биринчи бўлиб Марказий клиник шифохонага бордим, уни яхши кайфиятда кўрдим”, — деб ёзади Қодиров.
Шунингдек, Чеченистон раҳбари соғлиғи билан боғлиқ миш-мишларга изоҳ берди.
“Мен тирикман ва соғломман. Ҳатто касал бўлганимда ҳам нега шов-шув бўлиши кераклигини тушунмаяпман”, — деди у.
Чеченистон раҳбарининг касаллиги ҳақидаги миш-мишлар
Қодировнинг соғлиғи кескин ёмонлашгани ҳақидаги миш-мишлар 2023 йилнинг баҳорида пайдо бўлганди. Бунга Чеченистон раҳбарининг ўзгарган қиёфаси сабаб бўлган. Жумладан, у жуда кўп вазн олган, юзлари шишган ва носоғлом кўринишга эга бўлган. Шундан сўнг буйрак билан боғлиқ муаммолар ҳақидаги версиялар пайдо бўлган. Муаммолар заҳарланиш натижасида юзага келгани ҳақида миш-мишлар тарқалган.
Манбаларнинг таъкидлашича, сўнгги пайтларда Чеченистон раҳбари кўп вақтини хорижда ўтказиб, республикани бошқаришдан узоқлашмоқда. Ўз навбатида, Рамзан Қодиров бедаво дардга чалингани ҳақидаги миш-мишларни рад этиб келади.
У аввалгидек спорт билан шуғулланиши, тоғларга чиқиши, Чеченистонни ривожлантиришдаги муҳим масалаларни муҳокама қилиш билан шуғулланаётганини таъкидлаганди. Бундан ташқари, у қўлида тиббий асбоб эмас, балки электрон тасбеҳ борлигини тушунтирган.
Изоҳ (0)