Чеченистон раҳбари Рамзан Қодировнинг 15 ёшли ўғли Адам Қодиров тергов изоляторида Қуръонни ёқиб юборгани учун ҳибсга олинган 19 ёшли Никита Журавелни калтаклаганди. Рамзан Қодиров мазкур ҳолатга билвосита муносабат билдирди.
Қодировнинг сўзларига кўра, Украина билан урушдан кейин Россия Қуръон ҳақоратланган давлатларга ҳужум қилади.
“Европанинг аксар давлатларини инсоний туйғуга эга бўлмаганлар бошқаради. Урушда 100 фоиз ғалаба қозонишимизга ишонамиз, Украинадан кейин биз Қуръонни ҳақоратлашган давлатларга борамиз. Агар уларда имонли одамлар бўлмаса, бизда борлигини англашлари керак”, — деди у.
Чеченистон раҳбарининг тегишли баёноти акс этган видеода Журавелни калтаклаган Адам Қодиров, шунингдек, аввалроқ Журавел “Чеченистонда жазо топади” деб ваъда берган Чеченистон матбуот вазири Аҳмад Дудаев иштирок этган.
22 май куни Волгоград суди 19 ёшли Никита Журавелни икки ойга ҳибсга олди. “РИА Новости” тегишли видеони чоп этган, унда Волгоград фуқароси дунё мусулмонларидан узр сўраган ва Қуръонни ёқиш “жуда ёмон иш” эканини айтган.
Сўроқ пайтида Журавел “Украина махсус хизматларининг кўрсатмаси билан 10 минг рубль мукофот эвазига” Қуръонни ёқиб юборганини ва ҳаракат протоколини “СБУ” ходимига топширганини айтган. Иш Чеченистон Республикасига ўтказилди, талаба Грознийга олиб кетилган.
Ҳуқуқ ҳимоячилари ва Тhе Insider суҳбатлашган адвокатнинг фикрича, ишни Чеченистонга ўтказиш қарори одамларни қўрқитиш ва Рамзан Қодировга Россияда Ислом динига тажовуз қилган ҳар қандай шахсни жиноий жавобгарликка тортиш ҳуқуқини бериш учун қабул қилинган.
Изоҳ (0)