Checheniston rahbari Ramzan Qodirovning qizi Ayshat Qodirova bosh vazirning ijtimoiy blok bo‘yicha o‘rinbosari etib tayinlandi. Bu haqda Qodirov o‘zining Telegram kanalida ma’lum qildi.

Bungacha Ayshat respublika madaniyat vaziri lavozimida ishlab kelgan. Uning o‘rnini Checheniston bosh vazirining sobiq o‘rinbosari Musa Dadayev egallaydi. Checheniston rahbarining aytishicha, qizini bu lavozimga tayinlash taklifi respublika hukumati raisi Muslim Xuchiyev tomonidan ilgari surilgan.

“Albatta, Ayshat Qodirova viloyat Madaniyat vazirligi faoliyatini takomillashtirishga katta hissa qo‘shgan va katta ish tajribasini to‘plagan”, — deydi Ramzan Qodirov.

4-sentyabr kuni Putin Ayshat Qodirovani II darajali “Vatan oldidagi xizmatlari uchun” ordeni bilan taqdirlagandi. Hujjatga ko‘ra, 24 yoshli Qodirova bir qancha odamlar qatori “milliy madaniyat va san’atni rivojlantirishdagi xizmatlari, ko‘p yillik samarali ijodiy faoliyati uchun” taqdirlangan.

Ayshat Qodirova 2021-yil oktyabridan Checheniston madaniyat vaziri lavozimida ishlab kelgandi. Bungacha u bir yil Checheniston Madaniyat vazirligi rahbarining birinchi o‘rinbosari sifatida faoliyat olib borgan.

Davlat xizmatidan oldin u Firdaws islom modalar uyini uch yil boshqargan. Shu vaqt ichida Ayshat

• “Checheniston oldidagi xizmatlari uchun” medali;
• “Inson huquqlarini himoya qilgani uchun” medali;
• “A’lo mehnati uchun” faxriy nishoni;
• Chechenistonda xizmat ko‘rsatgan madaniyat xodimi unvoni;
• Qodirov ordeni — respublikaning oliy mukofoti bilan taqdirlangan.

Ramzan Qodirov va uning oilasi muntazam ravishda taqdirlanib keladi. BBC rus xizmatining 2018-yilda hisob-kitoblariga ko‘ra, Chechenistondagi 158 nafar yuqori martabali amaldorning 30 foizi respublika rahbarining qarindoshlari, 23 foizi qishloqdoshlari, yana 12 foizi Checheniston rahbarining do‘stlari va ularning qarindoshlaridir. 

“Qarindoshlarimning har qanday muassasa va har qanday lavozimdagi talabi o‘n barobar ko‘p, chunki ular menga qaramay ishlashlarini isbotlashi kerak. Kimga ishonsam, o‘shani tayinlayman”, — degan edi Qodirov bu borada.