“Толибон” америкалик маҳбус Райан Корбеттни “Ал-Қоида” раҳбари Усама бин Ладеннинг собиқ ёрдамчиси Муҳаммад Раҳим ал-Афғонийга алишишга ҳаракат қилмоқда. Бу ҳақда Sputnik Афғонистон хабар берди.
Райан Корбетт 40 ёшли АҚШ фуқароси бўлиб, 15 ойдан бери “Толибон” назоратидаги қамоқхонада қолмоқда. У 2022 йил ёзида, “Толибон” Афғонистонда назорат ўрнатганидан роппа-роса бир йил ўтиб, Афғонистон шимоли-ғарбидаги Шибирғон шаҳрига немис ҳамкасби билан сафар қилган.
“Толибон” Корбеттни насронийликни тарғиб қилишда айблаган, америкалик маҳбуснинг оиласи буни рад этган. Сентябрь ойидан бери АҚШ Давлат департаменти Корбеттни озод қилишга ҳаракат қилмоқда. Аммо ҳозиргача бу муваффақиятсиз бўлди.
Бироқ, Байден маъмуриятининг юқори мартабали мулозимига кўра, “Толибон” Америкадан бу борада имкони бўлмаган нарсани амалга оширишини хоҳлайди. Жумладан, америкалик маҳбус эвазига 2008 йилдан бери Гуантанамо қамоқхонасида сақланаётган Афғонистон фуқароси Муҳаммад Раҳим ал-Афғонийни озод қилишни талаб қилмоқда.
Корбеттнинг рафиқаси бу хабарни тасдиқлаган. АҚШ фуқароси бир кишилик камерада ва оғир аҳволда экани айтилмоқда.
Изоҳ (0)