АҚШда 2001 йил 11 сентябрдаги қонли терактни уюштирганлик учун масъул бўлган “Ал-Қоида” раҳбари Усама бин Ладеннинг жасади денгизга ташлангани сабаби маълум қилинди. Бу ҳақда The Mirror хабар берди.
Хабарга кўра, тақиқланган террорчилик ташкилоти раҳбари кўмилган қабристон унинг мухлислари томонидан зиёратгоҳга айланмаслиги учун шундай йўл тутилган. Бин Ладен 12 йил олдин, 2011 йил 2 май куни Покистоннинг Абботобод шаҳрида яшириниб юрган уйининг учинчи қаватида отиб ўлдирилган.
У Марказий разведка бошқармасининг “Нептун найзаси” деб номланган 40 дақиқалик операцияси давомида йўқ қилинган. Ҳужум пайтида уйда бўлган яна тўрт киши, жумладан, унинг ўғли ва яна бир аёл ҳалок бўлган.
Шундан сўнг америкалик қўшинлар Афғонистонга қайтган, у ерда ДНК тести ёрдамида жасаднинг шахсини аниқлаган.
Аммо биринчи рақамли террорчининг жасадини дафн этиш миссияси ҳам муҳим жараён бўлган. АҚШ буни ўзи хоҳлаган тарзда ва гўё ислом анъаналарига риоя қилган ҳолда амалга оширганини илгари сурган.
Вашингтон бин Ладен дафн этилган жой келажакда жиҳодчилар учун зиёратгоҳ бўлиши ва кейинги террорчилик ҳужумларига туртки бўлишидан хавотирлана бошлаган.
Шу тариқа жасад Араб денгизига 1300 километр масофада ташланган. Жасад оқ кафанга ўралиб, қопга солинган. Жараён олдидан америкалик зобит араб тилида ёзилган матннинг тайёрланган таржимасини ўқиган.
Бу ёндашувни танқид қилувчилар ҳам кузатилган. Баъзилар бин Ладеннинг юзини Маккага қаратган ҳолда ерга дафн қилиш керак эди, деса, бошқалари Исломда фақат кемада вафот этган тақдирдагина денгизда дафн этишга рухсат берилишини айтган.
Бунга жавобан АҚШ террорчининг жасадини олишга рози бўладиган бирор мамлакат ёки ҳатто бирор шахс топилмаганини айтган. Аммо бин Ладеннинг катта оиласи уни осонгина қабул қилган бўларди, деган фикр билдирилган.
“Ал-Қоида” экстремистик гуруҳи жаҳоннинг бир қатор мамлакатлари ва халқаро ташкилотлар томонидан “террорчилик ташкилоти” деб топилган.
Изоҳ (2)
АҚШ даги теракт 2011 йилда эмас 2001йилда уюштирилган
2001- yil 11 sentyabr 2011-yil emas