Томошабинларга салбий роллари билан яхши таниш бўлган актёр Жавоҳир Зокиров 9 ноябрь куни 51 ёшни қаршилади. Шу муносабат билан ота-онасининг қарори сабаб “Болалар”ни тарк этишга мажбур бўлган, турмушда омадсизликка учраган ва айни кунларда энг қиммат гонорар оладиган актёр даражасига эришган Жавоҳир Зокировнинг ҳаёт ва ижодига назар ташлаймиз.
“Илк ролимни тўрт ёшимда ижро этганман”
Зокировлар сулоласининг машҳур вакиллари Жамшид ва Гавҳар Зокировалар хонадонида дунёга келган. Аммо илк ролини ота-онасининг иштирокисиз ижро этган. Яъни айримлар ўйлагандек, актёрга ота-онасининг ҳурмати сабаб роллар берилмаган.
— Илк ролимни 4 ёшимда ижро этганман. Ўшанда ҳамма болалар қатори боғчага борардим. Бир куни боғчамизга тасвирга олиш гуруҳи келган ва ролга тўғри келадиган болани излашган. Тўғриси, у пайтда қандай ролни ижро этганимни ҳам эслолмайман. Суратга олиш гуруҳининг шошилиб ишлаши, кимдир бақириши, “стоп, матор!” каби гаплар кино ҳақида илк тасаввуримни уйғотган. Ундан кейин олти ёшимдан бошлаб ота-онамга “Ўғлингиз фалон спектаклда рол ижро этиб бера оладими?” деб таклиф этишган. Санъаткорнинг фарзанди ўзи истаса-истамаса ҳам шу соҳанинг таъсирида улғаяди. 14 ёшимда “Юлдузли тунлар” спектаклида энг катта ролларимдан бири Бобурнинг болалик чоғларини ижро этганман. Аммо ўсмир ёшдан қўшиқчиликка қизиқишим ортиб, театрга бўлган қизиқишим сўнган, — дейди Жавоҳир Зокиров.
“Пулсизлик сабаб, Жавоҳирга палто олиб беролмаганмиз”
Жавоҳир Зокиров машҳур санъаткорларнинг фарзанди бўлса-да, оиласи молиявий қийинчиликлардан ҳоли бўлмаган. Актёр бу ҳақида эслашни истамайди, аммо онаси актриса Гавҳар Зокирова шундай хотирлайди:
— Театрдан оладиган маошимиз ниҳоятда кам эди. Унинг устига ўшанда энди икки хонали квартирага кўчгандик. Уй таъмирталаб ва ниҳоятда қаровсиз эди. Балкон қисмининг ромлари йўқлиги учун ғир-ғир шамол эсарди. Кеч кузга бориб уй совиб кетган, шунда қайнонам раҳматли сандиғидаги энг қадрли матони сотиб, ром олишимизга пул берганди. Эр-хотин тинимсиз ишласак ҳам ҳеч рўзғоримиз тўлмасди. Қизимиз Оҳиста Жамшидни мусиқа мактабига берганмиз, унга фортепиано олишимиз керак бўлган. Ўшанда қайнонам ва онам пенсияларидан пул тўплаб, мусиқий асбоб олиб беришганди. Учинчи синфда Жавоҳирга палто ололмадик. Ўшанда қайнопам Луиза қизи Наргизнинг эски палтосини берди. Унинг қўнғироқчаси ва пирпираги бор эди. Ўшанда Жавоҳир “Бу қизларнинг палтоси, киймайман”, деб роса тўполон қилганди. Бошқа иложим бўлмагани учун уни кийишга мажбурлаганман. Ҳаётимизда бу каби мисоллар жуда кўп. Айримлар ўйлаганидек бугунги кунларга етиб келишимиз осон кечмаган.
Руслан Шарипов сабаб тузилган “Болалар”
Ўсмирлик даврида қизиқишлар ўзгаради. Болаликдан театрда улғайган Жавоҳир Зокировда ҳам бирдан хонандаликка қизиқиш пайдо бўлди.
— У пайтда мактабда ўқирдим. Мен ҳам ҳамма ёшлар қатори замонавий қўшиқларни тинглаб юрардим. Бир куни Баҳодир Пўлатов исмли дўстим келиб, мусиқий гуруҳ тузиш нияти борлигини айтди. У Тоҳир билан бир мактабда ўқир ва уни яхши билар экан. Хуллас, биз маслаҳатлашиб раҳматли Руслан Шарипов билан учрашдик, — дейди Жавоҳир Зокиров.
Тоҳир Содиқов бежиз Жавоҳир Зокиров билан учрашишни истамаган. У пайтлари Руслан Шарипов Жавоҳирнинг аммаваччаси Наргиз Зокирова билан оила қурганди. Йигитларнинг таклифи Жавоҳир Зокировга маъқул келиб, уни Руслан Шариповнинг уйига етаклаб боради. Ўша пайтлари замонавий ўзбек қўшиқларини яратишда Руслан Шариповга тенг келадиган бастакор йўқ эди. У йигитларнинг таклифини эшитиб, “Болалар” номи остида гуруҳ ташкил қилиш таклифини киритади. “Болалар” гуруҳининг илк таркибида Баҳодир Пўлатов, Ҳусан Содиқов (Тоҳир Содиқовнинг акаси), Жавоҳир Зокиров, Наргиз Зокирова, Тофик Мордухаев, Тоир Одилов ва Тоҳир Содиқовлар бўлган.
“Ота-онам ‘Болалар’дан кетишимни истаган”
Ташкил этилганига кўп ўтмай “Болалар” катта машҳурликка эришди. Уларнинг қўшиқлари кириб бормаган ёшлар клублари қолмади ҳисоб. Аммо негадир Жавоҳир Зокировнинг ота-онаси ўғли бу гуруҳ билан чекланиб қолишини истамади. Ва уни Россиядаги машҳур ВГИК институтида ўқишга кўндиришди.
— Ота-онамнинг қарорига қарши чиққанман. Чунки гуруҳ билан гостроль сафарлари бораётган, қўлимиз пул кўрган пайтлар эди. Ўқишга кирсам ҳаммаси бошидан бошланарди. Аммо ҳозир ота-онамнинг ўша пайтдаги қарори тўғри бўлганига амин бўлдим. Тўғри, актёрликда қобилият муҳим, аммо профессионал бўлишни истаган актёр албатта, таҳсил олиши керак, — дейди Жавоҳир Зокиров.
“Талаб қиладиган ойлигим раҳбарларга ёқмайди”
Жавоҳир Зокиров институтни тамомлаб, собиқ Ҳамза номидаги театрга ишга киради. Аммо у ерда узоқ вақт фаолият юритолмайди. Театрдан кетишга қарор қилганини эса қуйидагича изоҳлайди:
— Маош кам, тайинли сценарий йўқ. Одам кўнгли тўлмаган ишни қилмаслиги керак. Ҳозир ҳам театрга қайтишга тайёрман, аммо талаб қиладиган ойлигим раҳбарларга ёқмаслиги аниқ. Ижодкор ҳеч нарсани ўйламай, фокусини фақат ижодга қаратиши учун олаётган маошидан қониқиши керак, — дейди актёр.
Хориж фильмидаги роли
Ўзбек кино оламида энг кўп гонорар оладиган актёрлардан бири Жавоҳир Зокиров 2011 йилда Қозоғистон ва Россия ҳамкорлигида суратга олинган режиссёр Эрмек Турсуновнинг “Май ойининг етти куни” фильмида бош роллардан бири Ҳасан образини гавдалантирган. Фильмда Жавоҳир Зокиров билан биргаликда машҳур актриса Евгения Лоза ва актёрлар Владимир Яглич, Сергей Угрюмов роль ижро этган.
“Салбий ролга кўпроқ пул тўлашади”
Жаҳоҳир Зокиров ижодида ижобий роллар ниҳоятда кам. У ижро этган салбий роллари эса томошабинлар нафратини уйғотиши аниқ. Актёр нега фақат салбий роллар ижро этишини қуйидагича изоҳлайди.
— Яширмайман, салбий ролларга кўп пул тўлашади. Чунки кўп актёрлар салбий ролларни рад этишади. Салбий роль актёрдан катта энергия талаб қилади. Ёниб ишлаш эса менга ёқади. Шунчаки кирди-чиқди ролни ўйнагим келмайди. Роль катта-кичик бўлишидан қатъий назар сценарийга “ёпиштириб” қўймаган бўлиши керак. Баъзан сценарий ёқмайди, аммо продюссер гонорарини тўлашга тайёр эканлигини айтади. Шундай ҳолатда кўзни юмиб пул учун ролга рози бўласиз. Аммо барибир кўнглим тўлмай ижро этганим ўзимга сезилади, — дейди актёр.
“Уч марта уйланганман”
Жавоҳир Зокиров омадли актёр, аммо шахсий ҳаётида муваффақиятга эришгунига қадар анча йилларни йўқотган. У омадсиз турмушлари ҳақида гапиришдан оғринмайди.
— Уч марта уйланганман. Илк марта 30 ёшимда уйланганман. Биласизми, кеч ёки эрта деган нарсани тушунмайман, бизда ёш уйлантириб қўйишади-ку. Ўзи эркак киши 30-40 ёшида секин ўзини таниб, эркаклигини ҳис қилади, деб ўйлайман. Европада кеч турмуш қурилади, улар оила қанақа бўлиши керак, қандай муносабат қуриш кераклигини тушуниб олади. Бизда буни билишмайди, фақат уйлантириб қўйишса бўлди. Бу нарсага жиддий қараш керак. Шунинг учун кеч уйланганман. Мен ўзимни ўзим оқлаётганим йўқ. Лекин ўйлашимча, вояга етган боладан “Уйланишга тайёрмисан”, деб сўраш керак. Фарзандли бўлгандан кейин, илм бериш, ўқитиш, ҳаммасига тайёр бўлиши керак. Биринчи турмушимдан бир йил ўтиб ажрашганман. Иккинчи аёлим билан ҳам бир йил яшаб, ажрашганман. У ҳар хил бўҳтонлар тарқатиб, ҳамма ерга хат ёзган, — дейди Жавоҳир Зокиров.
“Аёлим ишламаганда менга қийин бўларди”
Актёр учинчи бор буюк ўзбек ёзувчиси ва шоири Ғафур Ғулом авлоди бўлмиш Шаҳризод Ғуломова билан оила қурган. Ҳозирда уларнинг бир қиз ва икки ўғли бор.
— Аёлим инглиз тили таржимони бўлиб ишлайди. Баъзи пайтлар мендан ҳам яхшироқ пул топади. Агар у ишламаганда, менга анча қийин бўлган бўларди. Чунки актёрларнинг гонорари кўп кўрингани билан доимий эмас. Баъзан умуман ролларга чақиришмайди, баъзида эса чақирганларига боргим келмайди, — дейди актёр.
“Эркак икки масалада адашмаслиги керак”
Жавоҳир Зокиров эркак киши иккита қарорни қабул қилишда адашмаслиги кераклиги ҳақида ҳам гапирган.
— Ҳаётда хато ва камчиликлар бўлади, уларсиз нимагадир эришиш мушкул. Аммо эркак киши иккита қарорни қабул қилаётганда адашмаслиги керак. Биринчиси касб, иккинчиси эса хотин танлашда, — дейди актёр.
Ўзбекистондаги энг “қиммат” актёр
Ҳозирги кунда ўзбек киносидаги энг қиммат актёр Жавоҳир Зокиров ҳисобланади. Унинг бир ижодий куни 500 АҚШ долларига баҳоланади. Аммо актёрни ролга кўндириш, у билан ҳамкорлик қилиш осон эмас. Ижодкорнинг ўзига хос феъл-атвори ва принциплари бор.
— Ҳамиша яхши ижод тарафдориман. Бизда ҳам яхши ижодкорлар бор. Имкон бўлса Голливуд даражасидаги фильмларни ҳам ярата оламиз. Ажратилган пуллар ярим йўлда ушланиб қолмай, фақат ижодга сарфланиши керак, — дейди Жавоҳир Зокиров.
Изоҳ (0)