Давлат хавфсизлик хизмати “Ўзбекистон муҳим ахборот инфратузилмаси объектларини тоифалаштириш ва ягона реестрни юритиш тартиби тўғрисидаги вақтинчалик низомни тасдиқлаш ҳақида”ги идоралараро буйруқ лойиҳасини муҳокамага қўйди.
Буйруқ лойиҳасини ишлаб чиқиш зарурияти муҳим ахборот инфратузилмаси (МАИ) объектларини белгилаш ва тоифалаштириш, ушбу объектларда МАИ субъектлари томонидан киберхавфсизликни таъминлаш бўйича тегишли талабларни бажариш, шунингдек, МАИ объектларининг ягона реестрга киритиш масалаларини ҳал этиш билан боғлиқ.
Буйруқ лойиҳасига мувофиқ, МАИ объектларининг реестрига киритиш учун МАИ объектлари сифатида белгилаш ва тоифалаштиришнинг вақтинчалик тартиби белгиланади.
МАИ объектларини тоифалаштириш уларда юз бериши мумкин бўлган турли киберхавфсизлик ҳодисалари натижасида жамоат ва давлат хавфсизлигининг ҳаётий вазифалари, мудофаа қобилияти, иқтисодий барқарорлик ишдан чиқишига, экология ва атроф муҳит хавфсизлиги, қонун устуворлиги бузилишига ёки аҳоли ҳаётий фаолиятининг хавфсизлиги пасайишига, шунингдек, инсон ҳаёти ва соғлигига зарар етишига олиб келувчи кибертаҳдидлардан ҳимояланганлик даражасини таъминлаш мақсадида амалга оширилади.
Ахборотлаштириш тизимлари эгаси ахборотлаштириш тизимини МАИ объекти экани ҳақида қарор қабул қилади.
МАИ объектига учта тоифадан бири берилиши мумкин – “юқори”, “ўрта” ва “паст”.
МАИ объектларини белгилаш ва тоифалаш ушбу объектларда МАИ субъектлари томонидан киберхавфсизликни таъминлаш бўйича тегишли талабларни бажариш, шунингдек, МАИ объектларининг вақтинчалик реестрига киритиш учун шароит яратади.
Рейестрга ҳар бир МАИ объекти тўғрисида қуйидаги асосий маълумотлар киритилади:
- МАИ объектининг номи;
- Мулк ҳуқуқи, ижара ёки бошқа ҳуқуқий асосларда МАИ объектига эгалик қилувчи субъект тўғрисидаги маълумотлар;
- МАИ объектида ахборот ва киберхавфсизликни таъминлашга масъул бўлган ходим тўғрисида маълумотлар;
- МАИ объектининг татбиқ қилиш даражаси ва вазифаси;
- МАИ объектида фойдаланиладиган техник ахборотлаштириш, шунингдек, ахборот ва киберхавфсизликни таъминлаш учун қўлланиладиган аппарат, аппарат-дастурий ва дастурий воситалар ҳамда уларнинг лицензияси ва ахборот хавфсизлиги талаблари бўйича мувофиқлик сертификати ҳақида маълумот;
- МАИ объектини умумий телекоммуникация тармоғи, шунингдек интернет тармоғига уланиши ҳақида маълумот;
- МАИ объектида ахборот ва киберхавфсизликни таъминлашнинг ташкилий ва техник чоралари;
- МАИ объектига нисбатан ахборот хавфсизлиги таҳдидлари ва қоидабузарлик тоифалари ҳақида маълумотлар;
- МАИ объекти фаолиятида ахборот ва киберхавфсизлик ҳодисаси натижасида хатолик юз берганда ёки у ишдан чиққан тақдирда, юзага келиши мумкин бўлган оқибат ва зарарлар.
Ўзбекистонда кибержиноятчилик
Мамлакатда 2020 йилда ахборот технологиялари соҳасида 106 та жиноят қайд этилган. 2021 йилда бу кўрсаткич 2 281 тани, 2022 йилда эса бир йил аввалгидан икки баравар, 2 йил аввалгидан 40 баравар кўпайиб, 4 332 тани ташкил этган. Йил давомида қайд этилган ҳолатларнинг 3 372 таси ёки 82 фоизини банк пластик карталардан пул маблағларни талон-торож қилиш билан боғлиқ жиноятлардир.
Изоҳ (0)