Иқтисодиёт ва молия вазирлиги “Қўйлиқ” ва “Чорсу” деҳқон бозорларида қишлоқ хўжалиги маҳсулотларининг 13 ноябрдаги улгуржи нархлари ҳақида маълумот берди.
Бунда помидорнинг максимал нархи ўтган ҳафтадагисидан 5 000 сўм қиммароқ (аввалги нарх 20 000 сўм эди) эканини кўриш мумкин. Яъни “Қўйлиқ”да бир кило помидор 25 000 сўмгача бўлган нархда сотилмоқда.
Вазирлик ахборотига кўра, бир ҳафта давомида “Чорсу”да мол ва қўй гўштларининг нархлари ўзгармаган — мол гўштининг килоси 60 000–70 000 сўм, қўй гўшти 65 000–70 000 сўм сотилмоқда. Мазкур бозорда Лазер гуручининг килосини 18 000–25 000 сўм оралиғида, нўхатни 18 000–20 000 сўмдан, қизил ловияни 15 000–17 000 сўм, мошни 10 000–12 000 сўмдан харид қилиш мумкин.
“Қўйлиқ”да картошканинг бир килоси нархи 200 сўм қимматлаб, максимум 4 200 сўмдан сотилмоқда. Шу билан бирга, пиёзнинг килоси 1 200–2 200, сабзи 1 200–2 000 сўм.
Сабзавотлардан бодринг килоси 4 000–9 000 сўм, булғор қалампири 2 000–4 000 сўм, бақлажон 1 800–2 000 сўм.
Мевалардан бананнинг килоси 18–23 минг сўм, олма 4 000–18 000 сўм, нок 19 000–40 000 сўм (нархи ўзгармаган). Аммо узум ва анор нархлари қимматлашгани кўринади. Масалан, ўтган ҳафта узумнинг киломи максимум 45 000 сўмгача, анор эса 23 000 сўмгача сотилганди. Бу ҳафта бошида эса узумнинг килоси 90 000 сўмгача кўтарилди, анор нархи 35 000 сўмгача чиқди.
Вазирлик “Қўйлиқ” бозорида 28 турдаги мева, сабзавот, дуккакли ва гуруч маҳсулотлари нархлари бўйича маълумотлар эрталаб соат 5:00 дан 7:00 га қадар ўрганилганини қайд этган. “Чорсу” бозорида мол ва қўй гўшти нархлари бўйича маълумотлар эрталаб соат 5:00 ва 8:00 оралиғида йиғилгани эслатилган.
Изоҳ (0)