Навоий ва Фарғона вилоятларида ноқонуний равишда ўқишга киритиб қўйишни ваъда қилган шахслар қўлга олинди, деб хабар беради Бош прокуратура ҳузуридаги департамент.
Қайд этилишича, департаментнинг Навоий шаҳар бўлими томонидан ДХХ ва ИИБ ходимлари билан ҳамкорликда тезкор тадбир ўтказилган. Тадбирда Ғ.А. ва М.П. исмли шахслар фуқаро А.Х.га гўёки юқори лавозимда ишловчи танишлари ёрдамида қўшни Қозоғистондаги олий таълим муассасасида ўқигани тўғрисида ҳужжат тайёрлаб бериб, кейинчалик Қашқадарё вилоятидаги Ахборот технологиялари ва менежмент университетининг 3-босқичига ўқишга киритиб қўйишлари эвазига 1,5 минг долларни олган вақтларида ашёвий далиллар билан ушланган.
Шу каби, департаментнинг Фарғона вилоят бошқармаси томонидан ўтказилган тезкор тадбирда Г.В. исмли шахс ва бошқалар фуқаро М.О.ни гўёки юқори лавозимда ишловчи танишлари ёрдамида Марғилон шаҳридаги 1-сонли тиббиёт техникумига ўқишга киритиб қўйишлари эвазига 500 долларни олган вақтларида ашёвий далиллар билан ушланган.
Мазкур ҳолатлар юзасидан Жиноят кодексининг 168-моддаси (фирибгарлик) ва 28, 211-моддаси (пора бериш) билан жиноят ишлари қўзғатилиб, тергов ҳаракатлари ўтказилмоқда.
Аввалроқ Фарғона, Андижон, Гулистон давлат университетлари ва “Нархоз”га ўқишга киритиб қўйиш эвазига пул олган шахслар ушлангани хабар қилинганди. Шунингдек, Андижонда ўқишга киритишни ваъда қилиб, 4 минг АҚШ доллари олган ОТМ ходими қўлга олинган эди.
Изоҳ (0)