Шуҳрат Абдушарифович Вафоев Ўзбекистон президенти ҳузуридаги Стратегик ислоҳотлар агентлиги бош директори лавозимидан озод этилди. Бу ҳақда “Газета.уз” манбасига таяниб хабар берди.
Келтирилишича, унинг ўрнини Президент администрацияси ходими Баҳодир Раҳматов эгаллаши кутилмоқда.
Шавкат Мирзиёев 8 ноябрь куни SIА фаолиятини янада такомиллаштириш чора-тадбирлари тўғрисидаги қарорни имзолаган. Эндиликда агентлик бош директори бир вақтнинг ўзида Президент администрациясининг Ҳуқуқий экспертиза ва комплекс таҳлил департаменти бошлиғининг ўринбосари (эълон қилинаётган вақтда ушбу лавозимни Бекзод Мавлонов эгаллаб келаётган эди). Агентлик раҳбари бундан кейин ҳам президент томонидан тайинланади ва лавозимидан озод этилади.
Янги тузилмага кўра, агентлик бош директорининг бир ўринбосари бўлади (ҳозирда бир нафар биринчи ўринбосар ва ўринбосар мавжуд). Шунингдек, қарийб барча бошқарма ва бўлимлар, жумладан, Стратегик ташаббусларни илгари суриш бошқармаси, Давлат дастурлари мониторинги бошқармаси, Халқаро молия институтлари ва халқаро ташкилотлар билан ишлаш бошқармаси, Соҳа ва тармоқларда ислоҳотларни мувофиқлаштириш бошқармаси, Ислоҳотларни баҳолаш ва тизимли муаммоларни аниқлаш бошқармаси, Давлат бошқарувини такомиллаштириш бошқармаси ва бошқалар ҳам қисқартирилмоқда.
Улар ўрнига илғор хорижий тажриба ва рейтингларни ўрганиш асосида муҳим ташаббусларни ишлаб чиқиш гуруҳи, амалга оширилаётган ислоҳотлар самарадорлигини баҳолаш ва мониторинг қилиш гуруҳи, халқаро ва хорижий ташкилот ҳамда институтлар билан ўзаро ҳамкорликка асосланган муҳим ташаббусларни ишлаб чиқиш гуруҳи, хорижий экспертлар ва маслаҳатчилар билан ўзаро ҳамкорлик гуруҳи, илмий ташкилотлар билан ўзаро ҳамкорлик асосида муҳим ташаббусларни ишлаб чиқиш гуруҳи, лойиҳаларни бошқариш гуруҳлари ташкил этилмоқда.
Шавкат Мирзиёев фармони билан Шуҳрат Вафоев 2022 йил сентябрь ойида президент ҳузуридаги Стратегик ислоҳотлар агентлиги бош директори лавозимига тайинланган.
Изоҳ (0)