Ўзбекистон ва Афғонистон ўртасида темирйўл юклар ташуви 10 февраль, жума кунидан бошлаб тикланди. Бу ҳақда “Ўзбекистон темир йўллари” АЖ ахборот хизмати хабар берди.
Хабарга кўра, 8—10 февраль кунлари Термиз шаҳрида Афғонистон темирйўллари бошқармаси раҳбари Байтуррахмон Шарофат бошчилигидаги афғон делегацияси билан учрашув ўтказилди. Учрашув натижасида Афғонистон темирйўл бошқармаси ва “Согдиана транс” ШК ўртасида Ҳайратон–Мозори Шариф темирйўлини эксплуатасия қилишни келгусида давом эттириш бўйича янги шартнома имзолашга келишилди.
Шунингдек, Афғонистон томонига йўналтирилган вагонларни “Ўзбекистон темир йўллари” АЖнинг “Согдиана транс” ШК томонидан Ҳайратон станциясига етказиб бериш 10 февралдан қайта тикланди. Музокаралар якунида эришилган келишувлар бўйича баённома имзоланди.
Ўзбекистондан Афғонистонга темирйўл қатнови 1 февралдан бошлаб вақтинча тўхтатилганди. 4 февраль куни “Ўзбекистон темир йўллари” Афғонистон темир йўл бошқармаси раҳбарияти илтимосига кўра кейинги ҳафта бошида Термизда темирйўл орқали юкларни ташишни ташкил этиш, Ҳайратон станциясига етказиб бериш ва олиб чиқишни ташкил этиш бўйича “Согдиана транс” билан янги шартнома имзоланиши режалаштирилаётганини маълум қилганди.
Изоҳ (0)