Ўзбекистон Афғонистондаги Ҳайратон—Мозори Шариф темир йўлини бошқариш ҳуқуқидан маҳрум бўлгани ҳақида хабарлар тарқалди. «Ўзбекистон темир йўллари» матбуот хизмати буни рад этди.
Маълум қилинишича, 5—6 декабрь кунлари «Ўзбекистон темир йўллари» АЖ ва Афғонистон темир йўл бошқармаси вакиллари ўртасида 2023 йилга мўлжалланган Ҳайратон—Мозори-Шариф темир йўл участкасидан фойдаланиш бўйича музокаралар бўлиб ўтди. Бу ҳақда «Ўзбекистон темир йўллари» АЖнинг расмий веб-сайти ва расмий ижтимоий тармоқларида баён қилинди, лекин оммавий ахборот воситаларининг эътиборидан четда қолди.
Музокаралар якунида Афғонистон ҳудудидаги темир йўлларга хизмат кўрсатиш (эксплуатация)да иштирок этиш учун афғонистонлик маҳаллий техник ходимларини босқичма-босқич жалб қилиш бўйича амалдаги шартномани узайтириш ва йўл харитасини тайёрлаш бўйича келишувга эришилди.
«Шуни алоҳида таъкидлаш керакки, жорий йилнинг апрель ойида ҳам Афғонистондаги темир йўл участкасига техник хизмат кўрсатиш бўйича қатор ОАВлар томонидан асоссиз маълумотлар тарқатиш ҳолатлари бўлган. Ҳолат юзасидан Афғонистон темир йўллари раҳбари Б.Шарафат рад этган эди. Жумладан, Термиз шаҳрида бўлиб ўтган икки томонлама учрашувда жаноб М.Шарафат бундай баёнотлар бўлмаганлигини маълум қилди ва Ўзбекистоннинг ‘Согдиана Транс’ ШК билан муваффақиятли ҳамкорлик тўғрисида инглиз тилида тегишли интервью ҳам берди», — дейилади хабарида.
«Ўзбекистон темир йўллари» матбуот хизмати Афғонистон билан ҳамкорлик ҳақида келгусида ҳам ахборот бериб боришини билдириб, ахборот олишда расмий ва тасдиқланган манбалардан фойдаланишга чақирди.
Изоҳ (0)