Туркманистон президенти Сердар Бердимуҳамедов Иқтисодий ҳамкорлик ташкилотининг XVI саммитида иштирок этиш учун 8—9 ноябрь кунлари Тошкентга келишни режалаштирмоқда, деб хабар берди “Олтин Аср” маҳаллий туркман телеканали.
“Ҳукумат йиғилишида Туркманистон делегациясининг Ўзбекистонга амалий ташрифига тайёргарлиги муҳокама қилинди. Бердимуҳамедов халқаро ташкилотлар доирасидаги ўзаро манфаатли ҳамкорликни мустаҳкамлаш ва ривожлантириш мамлакат ташқи сиёсати стратегиясининг устувор йўналиши эканини таъкидлади”, — дейилади хабарда.
Ушбу ташкилотнинг аввалги саммити 2021 йил 28 ноябрь куни Туркманистон пойтахтида бўлиб ўтганди. Якунда минтақада энергия хавфсизлигини ошириш муҳимлиги ҳақида гапирилган Ашхобод консенсуси қабул қилинган.
Ушбу ҳужжат, умуман олганда, Иқтисодий ҳамкорлик ташкилоти давлатларининг савдо-иқтисодий, сармоявий, транспорт-логистика ва энергетика соҳаларида ҳамкорлигини кенгайтиришга қаратилган.
Ашхободдаги саммитда ташкилотга аъзо 10 та давлатдан 7 таси денгизга чиқиш имконига эга бўлмагани учун ягона транспорт кенгашини тузиш ташаббуси ҳам билдирилганди.
Якуний декларацияда Афғонистонда сиёсий инклюзия муҳимлиги, асосий инсон ҳуқуқлари, жумладан, аёллар ҳимояси, терроризмга қарши курашда самарали чоралар кўрилиши таъкидланган.
Эзиз Бояров
Изоҳ (0)