“Икки йил имтиҳондан йиқилганман” — актриса Юлдуз Ражабова таржимон бўлолмагани ва реп айтиш нияти борлиги ҳақида гапирди

Актриса Юлдуз Ражабова “Ҳай, майли подcаст”га берган интервьюсида инглиз тили таржимони бўлишни истагани, аммо бу борада омад кулиб боқмагани ва уни ҳар қандай вазиятда онаси қўллаб-қувватлаши ҳақида сўзлаб берди.

— Болаликдан рақс санъатига қизиққанман, аммо таржимон бўлиш хоҳиши устунлик қилган. Инглиз тилини ўрганишга жиддий киришганман, аммо икки йил Жаҳон тиллари университетига ҳужжат топшириб киролмаганман. Учинчи йил Ўзбекистон давлат санъат ва маданият институтига ҳужжат топшириш фикри туғилган. Албатта, қаршиликлар бўлган, аммо онам ҳамиша қўллаб-қувватлаб, имтиҳонларга ўзи олиб келган. Ҳар қандай инсон қўллаб-қувватлайдиган одамга муҳтожлик сезади. Бирор ишни қилишда иккиланиб турсангиз, ўша инсоннинг ишончи катта куч беради. Актриса бўлишимга онамнинг ишончи юқори бўлган.

Ҳозир ҳам инглиз тилини биламан ва ўрганишда давом этяпман, — дейди актриса Юлдуз Ражабова.

Актриса болаликдан қўшиқ айтишни яхши кўриши, кун келиб бу борадаги орзуларини ҳам амалга ошириши ҳақида ҳам айтиб ўтди.

— Реп йўналишидаги қўшиқни айтишга қизиқаман. Болаликдан қўшиқчиликка иштиёқим баланд бўлган. Лекин айнан соф реп йўналишида қўшиқ айтишни орзу қиламан, — дейди актриса.

Актриса Netflix томонидан суратга олинаётган Амир Темур ҳақидаги фильмда суратга тушаётгани ҳақидаги хабарлар яшин тезлигида тарқалганди. Аммо актриса суҳбат давомида фильмни Netflix олиш ёки олмаслиги номаълум эканини айтиб ўтди.

— Умид қиламиз, дуо қилиб туринглар. Чунки Netflix фильмни олиш олмаслигини ҳали аниқ эмас, — дейди актриса.