Иқтисодиёт ва молия вазирлиги “Қўйлиқ” ва “Чорсу” деҳқон бозорларида қишлоқ хўжалиги маҳсулотларининг 6 ноябрдаги улгуржи нархлари ҳақида маълумот берди.
Вазирлик ахборотига кўра, “Чорсу”да мол гўштининг бир килоси 60 000 сўмдан 70 000 сўмгача, қўй гўшти 65 000–70 000 сўм сотилмоқда. Мазкур бозорда Лазер гуручининг килосини 18 000–25 000 сўм оралиғида, нўхатни 18 000–20 000 сўмдан, қизил ловияни 15 000–17 000 сўм, мошни 10 000–12 000 сўмдан харид қилиш мумкин.
“Қўйлиқ”да картошканинг килоси 1 700–4 000 сўм, пиёз ва сабзи 1 200–2 200 сўмдан улгуржи нархларда сотилмоқда. Сабзавотлардан бодринг килоси 4 000–9 000 сўм, помидор 5 000–20 000 сўм, булғор қалампири 2 000–4 000 сўм, бақлажон 1 800–2 500 сўм.
Мевалардан бананнинг килоси 18–23 минг сўм, олма 4 000–18 000 сўм, нок 19 000–40 000 сўм, узум 8 000–45 000 сўмдан, анор 10 000–23 000 сўмдан сотилмоқда.
Вазирлик “Қўйлиқ” бозорида 28 турдаги мева, сабзавот, дуккакли ва гуруч маҳсулотлари нархлари бўйича маълумотлар эрталаб соат 5:00 дан 7:00 га қадар ўрганилганини қайд этган. “Чорсу” бозорида мол ва қўй гўшти нархлари бўйича маълумотлар эрталаб соат 5:00 ва 8:00 оралиғида йиғилгани эслатилган.
Маълумот учун, вазирлик юқоридаги икки бозорда сотилаётган қишлоқ хўжалиги маҳсулотлари нархларини эълон қилишни жорий йилнинг октябрь ойи ярмидан қайта тиклади. Дастлабки, салкам бир ой аввал эълон қилинган маълумотда ҳам гўштнинг улгуржи нархлари 60 000–70 000 сўм бўлгани келтирилган.
Изоҳ (0)