Голливуд юлдузи Бред Питт 40 миллион АҚШ долларига Марказий Калифорниянинг Кармел-Хайленд ҳудудидан ҳашаматли уй сотиб олди ва ўз номидаги кўчмас мулклар сонини яна биттага кўпайтирди. Бу мазкур ҳовли барпо этилганидан бери амалга оширилган энг қиммат келишувлардан бири ҳисобланади.
Уй 1918 йилда таниқли меъмор Чарльз Грин томонидан қурилган. Ака-ука Чарльз ва Генри Гринлар Калифорниядаги бунгалолар — томи текис кўринишда ёпилган бир қаватли уйлар услубининг йирик намоёндаларидан бўлишган. Аммо ушбу лойиҳада меъмор ўзи севган услубдан воз кечиб, уйни шу ердаги конлардан қазиб олинган қумтош ва гранит билан безатган.
Ўз вақтида тадбиркор ва ёзувчи Дениел Жеймс учун қурилган уй деворлари қоя билан туташиб кетгандек кўринади, уларнинг ўзига хос тузилиши одатий лойиҳалардан кескин ажралиб туради. Уйнинг барча хоналари битта қаватда жойлашган.
Бред Питт ноодатий кўринишдаги уйларни коллекция қилишга қизиқади, унинг дунё бўйлаб турли ҳудудларда жойлашган кўплаб кўчмас мулклари мавжуд. Актёр 1994 йилда Лос-Анжелеснинг Лос-Фелис ҳудудидан 1,7 миллион доллар эвазига камтарона уй харид қилган, 2000 йилда эса Санта Барбарадан, океаннинг шимолий соҳилидан майдони 4,5 гектарга тенг келадиган ҳовли сотиб олган.
Ижодкор 2008 йилда Франциядан 28,4 доллар эвазига Шато Миравал ҳовлисини харид қилган ва бу ерда Анжелина Жоли билан биргаликда фарзандларини тарбия қилишни режалаштирган эди. 2016 йилда ажрашишга қарор қилган жуфтлик Шато Миравал масаласида ҳалигача тортишиб келишади.
Изоҳ (0)