Туркиянинг Hurriyet нашри миллиардер Роман Абрамович Истанбулнинг Босфор бўғозида тахминий қиймати 18 миллион долларлик ҳашаматли уй сотиб олганини хабар қилди. Миллиардернинг ўзи мазкур маълумотни рад этмоқда.
Нашр маълумотларига кўра, мулк реконструкция қилинмоқда, янги эгаси у ерда вертолёт майдончаси қуришни режалаштирмоқда. Сотиб олинган мулк Истанбулнинг Босфор бўғози соҳилидаги Кандилли (Ваникей) деб номланган ҳудудда жойлашган. Мулкнинг умумий майдони 9600 квадрат метр, иккита бино тахминан 2000 квадрат метр майдонни эгаллайди.
Аввалроқ уйда туркий воиз, телебошловчи ва эволюция назариясини инкор этувчи таълимотлар муаллифи, Ҳорун Яҳё тахаллуси билан танилган Аднан Октар истиқомат қилган. У 2018 йилда ўнлаб айбловлар билан ҳибсга олинган ва 2021 йилда 1075 йиллик қамоқ жазосига ҳукм қилинган.
“Мулкнинг янги эгаси уйга олиб борадиган йўлларни таъмирлаб, ҳудудни тўсишга киришди. Бинолар жойлашган участкада таъмирлаш ишлари олиб борилмоқда”, — ёзади Hurriyet.
Таъкидланишича, уйнинг янги эгаси вертолёт майдончаси қуриш учун ҳам рухсат олган. Кейинроқ Абрамовичнинг вакили Forbesъга бизнесменнинг Истанбулдаги қасрни 18 миллион долларга сотиб олганини рад этди.
“Умуман олганда, бу ҳақиқат эмас”, — деди миллиардер вакили.
2018 йилнинг май ойида Абрамович Британиялик инвестор визасини узайтира олмагани учун Исроил фуқаролигини олди. 2021 йил апрель ойида у Сефард яҳудийларининг авлодлари учун дастур орқали Португалия паспортини олди. Россиянинг Forbes рейтингида Абрамович 9,2 миллиард доллар бойлиги билан 16-ўринни эгаллади.
Изоҳ (0)