Америка қирувчи самолёти Суриядаги АҚШ контингенти позициялари яқинида учаётган Туркиянинг ҳужумчи дронини уриб туширди. Бу ҳақда 6-октябр куни Пентагон матбуот котиби бригада генерали Пет Райдер Reuters агентлигига маълум қилди.
Воқеа бир кун олдин содир бўлган. Туркиянинг учувчисиз учоқлари Суриянинг Ҳасака шаҳрида АҚШ қўшинлари жойлашган жойдан бир километр узоқликда ҳаво ҳужумларини амалга ошираётган бўлган. Бир неча соат ўтгач, турк дрони Америка позицияларига ярим километр масофага яқинлашган.
Бу таҳдид сифатида таснифланган ва дрон Ф-16 қирувчиси томонидан уриб туширилган.
“Бизда Туркиянинг АҚШ кучларига атайлаб ҳужум қилгани ҳақида ҳеч қандай далил йўқ”, — деди Райдер.
Пентагондаги AP манбасининг таъкидлашича, дронни йўқ қилиш буйруғи берилгунга қадар америкалик ҳарбийлар туркиялик ҳамкасблари билан бир неча бор телефон орқали боғланган.
Туркия дрон унга тегишли эканини рад этмоқда
Туркия Мудофаа вазирлиги вакилининг Reuters агентлигига маълум қилишича, уриб туширилган учувчисиз учоқ Туркия қуролли кучларига тегишли эмас, лекин у дрон кимга тегишли бўлиши мумкинлиги ҳақида фикр билдирмади.
Туркия Анқарадаги терактдан сўнг Сурия ва Ироқда Курдистон ишчи партияси объектларига зарбалар бермоқда, деб хабар қилди Reuters. Анқара шунингдек, Сурияга қуруқликдаги қўшинларни киритиш масаласини ҳам кўриб чиқмоқда, чунки террорчилардан икки нафари ўша ердан келгани хабар қилинган.
Изоҳ (0)