Дунёдаги энг нодир олмос 43 млн долларга сотилди (видео)

Женевада бўлиб ўтган аукционда ноёб кўк олмос 43,8 миллион долларга сотилди. Бу ҳақда Christie’s аукцион уйи хабар берди.

Олмоснинг оғирлиги 17,61 карат ва у ўзининг ғайриоддий ранги туфайли Bleu Royal номини олган. Қимматбаҳо тош қарийб 50 йил давомида шахсий коллекцияда бўлган ва у биринчи марта кимошди савдосига қўйилган.

“Ушбу олмос ҳозиргача топилган энг ноёб тошлардан биридир”, — дейилади аукцион уйи баёнотида.

Christie’s аукцион уйи сўнгги 250 йил ичида оғирлиги ўн каратдан ортиқ бўлган бор-йўғи учта кўк олмосни сотувга қўйган: 2010, 2014 ва 2016 йилларда.

Bleu Royal 2023 йилда сотилган дунёдаги энг қиммат заргарлик буюмига айланди. Навбатдаги онлайн-аукцион 3 ноябрдан 16 ноябргача бўлиб ўтади. Унда Одри Хепберннинг “Рим таътили” фильмидаги машҳур марварид маржонлари намойиш этилади.