Исроил мудофаа кучлари матбуот котиби Даниэль Хагарийнинг маълум қилишича, Исроил қўшинлари Ғазо шаҳрини (Ғазо секторидаги 700 мингдан ортиқ аҳолига эга энг йирик шаҳар) қуршаб олди ва шу тариқа минтақани шимолий ва жанубий қисмларга бўлиб ташлади.
Даниэль Хагарийнинг қўшимча қилишича, Ғазо аҳолисини секторнинг жанубий қисмига эвакуация қилишга рухсат берилган. Ҳозирда эвакуация учун жанубга бир томонлама йўлак очиқлигича қолмоқда.
“Биз Ғазо шимоли ҳамда Ғазо шаҳрига икки баравар куч билан ҳужум қилишни давом эттирмоқдамиз. Қуруқликдаги операциялар бошлангандан бери биз 2500 дан ортиқ нишонни ургандик. Шунингдек, шу соатда биз ер ости ва ер устидаги инфратузилмаларга кенг миқёсли ҳужум уюштирмоқдамиз. Биз кечаси ва кундузи кўп сонли ҳужумлар амалга оширмоқдамиз ва бугун кечқурун муҳим операция ўтказамиз”, — деган Хагарий.
Шунингдек, Исроил мудофаа кучлари матбуот котиби 5 ноябрь куни Исроил кучлари Ливаннинг жанубида “Ҳизбуллоҳ” ҳаракати жойлашган бир қатор нишонларга зарбалар берганини айтиб ўтган.
Маълумотларга кўра, ҲАМАС ва Исроил ўртасида давом этаётган тўқнашувларда 347 нафар исроиллик ҳарбий ҳалок бўлган. Ғазо секторида Исроил ҳужумлари сабабли ҳалок бўлган болалар сони 3,4 мингдан ошган.
Эслатиб ўтамиз, 31 октябрь куни Исроил бош вазири Биньямин Нетаньяху ҲАМАС билан урушнинг учинчи босқичи бошланганини эълон қилган эди.
Изоҳ (0)