ҲАМАСга қарши уруш Исроил учун неча пулга тушиши ҳисоблаб чиқилди

Исроил Молия вазирлиги ҲАМАС билан уруш бир йилгача давом этиши учун қанча маблағ кетишини ҳисоблаб чиқди. Бу ҳақда Calcalist хабар берди.

Маълум қилинишича, Фаластин гуруҳи билан уруш Исроилга 200 миллиард шекел (51 миллиард доллар)га тушади. Конфликт саккиз ойдан бир йилгача давом этса, Ғазо секторидан ташқарига тарқалмаса ва 350 минг захирадаги аскар тез орада ишга киришса, шунча маблағ керак бўлади.

Тегишли прогнозни бюджетга 160 миллиард шекел (40,8 миллиард доллар) тушган коронавирус пандемиясининг оқибатлари билан солиштириш мумкин. Пандемия уруш прогнозига нисбатан икки йил давом этган.

“Бундан ташқари, блокировкалар тугагандан сўнг, барча тўлиқ иқтисодий фаолиятга қайтди, саноат, инвестициялар, истеъмол ва бандлик даражаси тезда тикланди; 2021–2022 йиллар учун ялпи ички маҳсулот реал кўринишда 15 фоизга ўсди”, — дейилади хабарда.

Молия вазирлиги жанговар ҳаракатлардан тикланиш секин кечишини ва уруш тугаши билан иқтисодиёт урушдан олдинги тенденцияларга қайтмаслигини таъкидлади. Исроил хавфсизлик секторига энг кўп маблағ сарфлаши кераклиги кўрсатилган.