Россия ва Ливия расмийлари Африка давлати ҳудудида Россия ҳарбий базасини қуриш бўйича музокаралар олиб бормоқда. Бу ҳақда Bloomberg хабар берди.
Аноним манбаларга кўра, Россия президенти Владимир Путин ва мамлакат шарқини назорат қилаётган Ливия миллий армияси бош қўмондони Халифа Хафтар ўртасидаги ҳарбий келишув уларнинг 2023 йил сентябрь ойи охирида Москвадаги учрашувидан кўп ўтмай бошланган.
Ушбу келишувнинг бир қисми сифатида Россия ўз ҳарбий кемаларини, эҳтимол, Ўрта Ер денгизи соҳилидаги Тобрук портида доимий равишда жойлаштириш ҳуқуқини олиши мумкин. Шунингдек, Россия ҳозирда “Вагнер” қирувчи самолётлари жойлашган бир нечта ҳаво базаларига эгалик қилиши кутилмоқда.
Шу билан бирга, Ливия Россия таъминлай оладиган ҳаво ҳужумидан мудофаа тизимларига муҳтож. Бундан ташқари, рус ҳарбийлари Хафтарга учувчилар ва махсус аскарларни тайёрлашда ёрдам бериши мумкин.
Россия Ливия портидан ҳарбий мақсадларда фойдаланиши учун порт инфратузилмасини модернизация қилиш зарур.
АҚШнинг Ливия бўйича собиқ махсус вакили Жонатан Вайнер америкалик расмийлар Ливияда Россия ҳарбий иштирокини кенгайтириш мавзусига “жуда жиддий” қарашини таъкидлади.
“Россияни Ўрта Ер денгизидан узоқда ушлаб туриш асосий стратегик мақсад эди — агар Россия у ерда портларга эга чиқса, бу унга бутун Европа Иттифоқига жосуслик қилиш имкониятини беради”, — деди Вайнер.
Изоҳ (0)