Қарши ҳужум бошланганидан бери Украина Қуролли Кучлари жанг майдонида муҳим муваффақиятларга эриша олмай, 90 мингдан ортиқ ҳарбий хизматчисидан айрилди. Бу ҳақда Россия мудофаа вазири Сергей Шойгу Пекиндаги Сяншан форумида сўзлаган нутқида айтиб ўтди.
“Биргина 4 июндан бери, яъни Украинанинг Ғарб ҳомийлигида қарши ҳужуми бошланганидан бери Киев 90 мингдан ортиқ ҳарбий хизматчини, 600 га яқин танки ва 1,9 мингга яқин турли синфдаги зирҳли техникасини йўқотди. Шу билан бирга, жанг майдонида тактик жиҳатдан аҳамиятли муваффақиятларга эришилмади”, — деди Шойгу.
Шу билан бирга, у Россия ҳарбийлари “ўзларига юкланган вазифаларни услубий ва ишончли бажаришда ҳамда тинч аҳоли хавфсизлигини таъминлашда давом этишини” таъкидлади.
Шойгу Ғарбни Европадаги “ўткир инқироз”ни Осиё-Тинч океани минтақасига тарқатишга интилаётганликда айблади. Унинг сўзларига кўра, “бу ёндашув Россия ва Хитой томонидан илгари сурилган бўлинмас хавфсизлик тамойилидан кескин фарқ қилади”.
Украина ёз бошидан бери қарши ҳужум уюштирмоқда. Мамлакат президенти Владимир Зеленский жанглар оғир кечаётганини ва Украина Қуролли кучлари жиддий қаршиликка дуч келаётганини тан олган.
Изоҳ (0)