“Бахтли якун бўлмайди”: Зеленский Украина армиясининг қарши ҳужуми ҳақида гапирди

Украина президенти Владимир Зеленский CNN телеканалига берган интервьюсида Украина Қуролли кучларининг қарши ҳужумини бахтли якун билан тугайдиган фильм эмаслигини айтди.

“Биз ҳаммамиз муваффақият ва бахтли якунга эришмоқчимиз. Лекин бу бир ярим соатлик фильм эмас. Бу қарши ҳужумдир. У бахтли якунга эга фильм эмас. Бизда бахтли якун бўлмайди.

Кўп одамларни йўқотдик, буни тан олишимиз керак. Ғалаба — деоккупацияга олиб келадиган ва Россияга бошқа мамлакатларга: Болтиқбўйи мамлакатларига, Польшага ҳужум қилиш ва барчамизни Совет Иттифоқига қайтариш имкониятини бермайдиган ягона йўл”, — деди у.

Украина қарши ҳужуми

Украина қуролли кучларининг қарши ҳужуми 2023 йилнинг ёзида бошланди. Тез орада хорижий матбуот саҳифаларида қарши ҳужум танқид қилина бошланди. Июнь ойида Украина президенти Владимир Зеленский ҳужум, жумладан, йирик миналанган майдонлар туфайли “хоҳлагандан кўра секинроқ” кетаётганини айтди. Сентябр ойи бошида Украина қуролли кучлари жанубий фронтда рус қўшинларининг биринчи, энг мустаҳкам мудофаа чизиғини ёриб ўтганини эълон қилди.