Ukrainaning korrupsiyani bartaraf qilish milliy agentligining bayonotiga ko‘ra, Shveysariyaning Nestle kompaniyasi Rossiyaga mahsulot yetkazib berishda davom etmoqda va u yerdagi oziq-ovqat ishlab chiqarish bazasini kengaytirmoqda.
Shveysariyaning Nestle korporatsiyasi dunyodagi eng yirik oziq-ovqat ishlab chiqaruvchilardan biri bo‘lib, u 187 mamlakatda faoliyat yuritadi.
“Rossiyaning Ukrainaga nisbatan agressiyasiga qaramay, kompaniya Rossiya Federatsiyasida o‘z faoliyatini davom ettirmoqda. Nestle tajovuzkorga mahsulot yetkazib bermoqda va Rossiyada ishlab chiqarishni kengaytirmoqda”, — deyiladi agentlik bayonotida.
Kompaniya Rossiya bozorida kam daromad topishiga qarmay, bu bozorni tark etmasligini bildirgan. Kompaniya bu qarorini mamlakat aholisini zarur mahsulotlar bilan taʼminlash va rossiyalik xodimlariga g‘amxo‘rlik qilish bilan izohlagan. Maʼlumotlarga ko‘ra, Rossiyada Nestle kompaniyasining kamida yettita zavodi bor, ularda 7000 dan ortiq ishchi ishlaydi.
Qayd etilishicha, Nestle kompaniyasi 2022-yilda Rossiyaga 374 million dollarlik yarim tayyor mahsulot va xomashyo import qilgan. 2023-yilning to‘qqiz oylik hisob-kitoblariga ko‘ra, bu ko‘rsatkich 271 million dollarni tashkil qiladi.
Shu bilan birga, Nestle kompaniyasi Ukrainada ham biznes bilan shug‘ullanadi. 2022-yilda kompaniya mamlakatda yangi zavod qurishni boshladi va 2024-yilda ishlab chiqarish hajmini oshirish niyatida.
Ma’lumot o‘rnida, Ukraina Qurolli kuchlari bosh qo‘mondoni Valeriy Zalujniy Britaniyaning The Economist gazetasi uchun yozgan maqolasida Rossiya va Ukraina o‘rtasidagi mojaro harakat va tezlikni o‘z ichiga olgan manyovrli urushni emas, balki statik va tinkani qurituvchi janglar bilan yangi pozitsion urush bosqichiga o‘tayotganini aytdi.
Izoh (0)