Шавкат Мирзиёев Қозоғистон президенти Қосим-Жўмарт Тўқаевнинг таклифига биноан 2—3 ноябрь кунлари Туркий давлатлар ташкилоти Давлат раҳбарлари кенгашининг навбатдаги йиғилишида иштирок этиш учун амалий ташриф билан Остона шаҳрида бўлади. Бу ҳақда президент матбуот хизмати хабар берди.
Қайд этилишича, саммит кун тартибидан ташкилот доирасидаги кўп томонлама ҳамкорликни, энг аввало, савдо-иқтисодиёт, инвестиция, транспорт-коммуникация, экология, маданий-гуманитар ва бошқа соҳаларда янада ривожлантириш масалалари ўрин олган.
Делегациялар раҳбарлари халқаро сиёсат ва минтақавий ҳамкорликнинг долзарб масалалари юзасидан ҳам фикр алмашадилар.
Тадбирлар якунида қатор қўшма ҳужжатлар қабул қилиниши кўзда тутилган. 2023 йилда Туркий давлатлар ташкилотига Ўзбекистон раислик қилмоқда. Кўп қиррали ҳамкорликни янада чуқурлаштиришга қаратилган 100 дан ортиқ муҳим тадбир ўтказилган.
Ташкилотга Ўзбекистон, Озарбайжон, Қозоғистон, Қирғизистон ва Туркия аъзо, Венгрия ва Туркманистон ташкилотда кузатувчилардир.
Эслатиб ўтамиз, Самарқандда 2022 йил 10—11 ноябрь кунлари Туркий давлатлар ташкилотининг биринчи саммити ўтказилганди.
Изоҳ (0)