Президент қарори билан айрим қарорларга қўшимча ва ўзгартиришлар киритилди, деб хабар беради Telegram даги “Ҳуқуқий ахборот” канали.
Унга кўра:
- 2024/2025-ўқув йилидан Миллий гвардия Тошкент “Темурбеклар мактаби” ҳарбий-академик лицейига аёл жинсидаги Ўзбекистон фуқароларини қабул қилиш имконияти яратилади;
- Миллий гвардия Қўриқлаш бош бошқармаси Болалар психологияси маркази ишчи ва хизматчиларининг лавозим маошлари оширилади.
Шунингдек, Миллий гвардия Қўриқлаш бош бошқармаси маблағлари ҳисобидан Миллий гвардия бўлинмалари ва ҳарбий қисмларининг объектларига қуёш фотоэлектр станциялари ва қуёш сув иситиш қурилмалари босқичма-босқич ўрнатилади.
- Август ойида ОТМларга кириш имтиҳони натижалари эълон қилингач, максимал балл тўплаб ҳам контракт асосида ўқишга кирган абитуриентлар мавзуси ва “Темурбеклар мактаби” битирувчиларига берилган имтиёз жамоатчилик эътирозларига сабаб бўлганди. Хусусан, ҳуқуқшунос блогер Хушнудбек Худойбердиев имтиҳон натижаларига имтиёзли балл қўшмаслик кераклиги ва “Темурбеклар мактаби” битирувчиларига имтиёз берилган тақдирда ҳам, фақат ҳарбий ОТМлар учун берилиши лозимлигини қайд этганди.
- Билим ва малакаларни баҳолаш агентлиги раҳбари Мажид Каримов бу масала давлат комиссияси томонидан кўриб чиқилишини айтган эди. Кейинроқ Жаҳон иқтисодиёти ва дипломатия университетига максимал балл тўплаган, аммо контракт асосида ўқишга кирган 5 нафар абитуриент президент имтиёзи асосида грантда ўқийдиган бўлди.
- Эслатиб ўтамиз, 2019 йил 28 июндаги президент қарорига асосан, “Темурбеклар мактаби” битирувчиларига ҳарбий таълим муассасаларига кириш имтиҳонларида тўплаган балларининг 30 фоизи, бошқа давлат ОТМларига ўқишга киришда тўплаган балларининг 15 фоизи миқдоридаги қўшимча баллар кўринишида имтиёз бериб келинади.
- Шунингдек, ҳужжатда мазкур мактабларни имтиёзли диплом билан тамомлаган битирувчиларга таркибида “Темурбеклар мактаби” бўлган вазирлик ва идораларнинг тегишлилиги бўйича олий ҳарбий ёки ихтисослаштирилган билим юртларига тест синовларсиз, ҳарбий-касбий саралаш тадбирларини муваффақиятли ўтиш натижалари бўйича кириш ҳуқуқи берилиши белгиланган.
Изоҳ (0)